Apuia'n goal hnih a khung

Zirtawpni zan khan Mumbai City chuan Indian Super League inkhelah 3-0 in East Bengal an hneh a, Mizo tlangval Lalengmawia Ralte chuan goal hnih khungin, Greg Stewart chuan goal khat a khung bawk.

Mumbai tan hian Lallianzuala Chhangte chuan inkhel bul a ṭan ve bawk a, East Bengal lamah Jerry Lalrinzuala leh Lalchungnunga ten bul an ṭan thung.

Inrinni zanah inkhel pahnih awm zuiin, inkhel hmasa zawkah Bengaluru chuan 1-0 in Jamshedpur FC an hneh a, Danish Farooq chuan minute ngana lekah inkhela goal awmchhun a khung.

Jamshedpur tan Laldinliana Renthlei leh Ricky Lallawmawma ten inkhel bul an ṭan a, season hmasa league round hmahruaitu hian tun season-ah beisei an phak lo hle - match 10 aṭangin point li chiah an la nei.

Inrinni zan inkhel hnuhnung zawkah FC Goa chuan 2-1 in NorthEast United an hneh a, Goan club tan Edu Bedia leh Iker Guarrotxena ten goal khat ve ve an khung - Highlander tana hun pek belha Wilmar Jordan-a penalty khungin awmzia a nei phak lo.

Goa tan Ayush Chhetri chuan inkhel bul a ṭan a, Highlander tan Joe Zoherliana leh Rochharzela ten bul ṭanin, bench aṭangin Emanuel Lalchhanchhuaha a lut bawk.