Sinisa Mihajlovic a thi

AC Milan coach hlui Sinisa Mihajlovic chu December 16, Zirtawpni zan khan thisen cancer avangin a thi a, kum 53 mi a ni. Serie A chuan, "Kan game, ram leh thinlunga danglamna a thlente hi kan hre reng tawh ang," tiin a thlah.

Yugoslavia vanglaia an player langsar ni phak, ram tana match 63 khel a, World Cup 1998 leh Euro 2000-a inlan Sinisa hian a career ṭantir lamah an ram club Vojvodina leh Red Star Belgrade tan a khel tih loh chu Serie A club tan vek a khel.

Red Star Belgrade hi European Cup 1990-91 season-ah khan a champion pui a, season khat dang a khelh leh hnuah 1992-93 season khan AS Roma a zawm a, Sampdoria, Lazio leh Inter Milan tan a khel bawk.

Lazio leh Inter Milan hi Serie A nomawi a chawipui a, Coppa Italia-ah vawi hnih ve ve a champion pui bawk - kum 1999 khan Yugoslavia Player of the Year-ah thlan a ni a, ESM team of the Year-ah ṭum hnih a lang thei bawk a ni.

Serbian FA chuan, "Football chuan a inrin hmain Europe leh khawvel champion footballer chu a chân ta. Football chanchina freekick pet thiam ber pawl, player, coach leh selector - Serbian leh Italian football-a sulhnu ropui tak hnutchhiahtu chu kan mangṭha ta," an ti.

Lazio chuan, "Khelmual chhung leh pawna mi huaisen bik a ni," tiin an player hlui chu an thlah a, 1999-2000 season-a Serie A nomawi an chawpui khan SvenGoran Eriksson chu manager an ni a, a khelhpui zingah Italy manager ni mek Roberto Mancini leh Atletico Madrid manager Diego Simeone an tel.

Serie A club Lazio chuan, "Khelmuala a huaisenzia a lantir ṭhin kha, natna khumah huaisen lehzualin a bei let a, kha natna khan a thinlung a hneh ngai lo," an ti.

Inter Milan tana Sinisa khelhpui ṭhin, player ropui Javier Zanetti chuan, "Ṭhian ṭha tak a ni a, tunah chuan a kal ta. Football tana a hnathawh a ropui takzet a, a chhungte kan hre reng a ni," tiin a ṭhianpa chu a thlah ve bawk.

Italy prime minister Giorgia Meloni chuan, "Khelmual leh hringnunah sakeibaknei ang maiin i bei ṭhin a nih kha," a ti a, Italian football-a thawhhlawk tak coach leh player chu a thlah.

Sinisa hian inkhelh chawlhsana, coaching a luhchilh hnuah pawh Italian club hlir a enkawl a, Bologna, Catania, Fiorentina, Sampdoria, AC Milan, Torino leh Sporting Lisbon a enkawl hman.

International football-ah chuan Serbia a enkawl hman a, a coaching career bul ṭanna Bologna-ah vek a coaching hun tawp a hmang - September 2022 khan Bologna hian an ban.

Bologna president Joey Saputo chuan a hunlai khan, "Bologna President ka nih hnua thutlukna siam harsa ber a ni," tiin a lo sawi hial tawh.

Saputo chuan, "Sinisa hun tawn thim leh duhawm thlenga hriatpuiin, kan chenpui a, professional takin kan indawr a ni mai lo a, mihring mihrinna piah lam thil a ni.

"Mihajlovic hian mipui hriata a natna a puan zar aṭang khan tum ruh leh huaisen tak chungin a natna kha a hmachhawn a, damdawi ina hun hman a ngai fo chung leh, enkawlna hautak em em kalpui a ngai reng chung khan he team hi a hlatsan ngai lo.

"Player-te nen inpawh taka an awm theih nan a theihtawp a chhuah reng a, a staff -te inpekna pawh kha fak tlak a ni," a ti.

AC Milan chuan, "Vanram chuan miropui tak pakhat a lo lawm leh ta a, Sinisa, kan ngai ngawt ang che," tiin twitter lamah an pholang ve bawk a, an coach hlui an nghilh lo.