England-ah Southgate a cham dawn

Gareth Southgate dinhmun a chian loh reng hnuah nizan khan tihchian a ni ta a, England boss hi European Championship 2024 zawh thlengin Three Lions boss a ni dawn.

World Cup quarterfinal aṭanga England an tlak hnu khan Southgate hian a hma hun a chian loh thu a sawi a, a ngaihtuahna a buai rih thu media hmaah a sawi - tunah erawh a cham dawn tih a chiang ta.

Kum 52 mi Southgate hian kum 2016 aṭang khan England hi a enkawl ṭan a, World Cup 2018-ah semifinal hruai thlengin, Euro 2020-ah fi nal a hruai thleng bawk - nomawi chawi lo mah se a record hi a chhe hran lo.

Football Association chief executive Mark Bullingham chuan, "Gareth Southgatea'n England manager hna a chhunzawm dawn tih chu lawm takin kan puang a, Euro 2024-ah kan team a kaihruai dawn a ni," a ti.

Bullingham chuan sawi zawmin, "Gareth leh assistant manager Steve Holland te hi engtiklai pawhin kan thlawp reng a, Euro tana kan inpuahchahna chu tunah hian a inṭan nghal bawk," a ti a, Southgate-a duh lotute tan ngaihthlak a nuam lo ang.

England tana vawi 57 inlan tawh Southgate hian Sam Allardyce ban a nih khan thla hnih chhung manager lailawk hna a chelh a, November 2016-ah official-in manager nghet atan lakluh a ni.

Three Lions hi match 81-ah kaihruaiin, vawi 49 hnehna a chanpui a, vawi 14 an tlawm. Three Lions hi knockout match parukah hnehna a chanpui a, England a enkawl hma kum 48 chhunga England coach-te knockout round-a an chak zat nen a inang.

Mahse, Southgate hian mipui duh ber nomawi erawh England tan a la chhawp thei lo a, a vanduai ṭhin hle. World Cup 2018 semifi nal-ah Croatia laka 1-0 a hma an hruai chungin, 2-1 in an tlawm a, Euro 2020 fi nalah penalty hmangin an tlawm.

Kumin World Cup-ah UEFA Nations League group match ruka chak nei miah loin an kal a, mahse, group hmahruaitu ni chunga last 16 lutin, Senegal chu harsatna nei loin an hneh.

Mahse, quarterfi nal-ah France an tawng a, Harry Kane-a'n penalty a hlah a, 2-1 in Les Bleus lakah an tlawm a, kut ruak bawkin an haw.

Southgate hian Middlesbrough chu 2006-2009 inkar kha enkawlin, a coaching career ṭanna a ni a, 2013-16 inkar kha England Under-21 a enkawl bawk a ni.