Mike Tyson vs Roy Jones Jr Khawvelin Iron ‘Mike’ a hmu chak tawh

Kar hmasa khan Mike Tyson-a'n ring chhung a luh leh tur thu puan a ni a, boxing khawvel chuan a vanglaia boxer rothap ber ang hiala sawi lo kir leh tur hmuh châkin a ring a fan nghal. 

Tyson hi exhibition match khel tur chauha lo kir leh tur ni mah se round riat an inhnek dawn miau avangin a lo kir leh tur hi sawi nep theih a ni lo a, a hmachhawn tur hi weight division palia champion tawh Roy Jones Jr a nih bawk avangin a nep thei lo.

American boxer pahnih hi September 12-ah an inhnek dawn a, Los Angeles khawpuiah inhnek hi nghah a ni dawn - hriat tel tur erawh boxer pahnih kum belhkhawm hi 105 a tling a, an vanglai nena khaikhin chi erawh a ni lo ang. 

Kum 2005 chu rei tak a ni leh tawh. Brad Pitt-a'n Mr. & Mrs. Smith-a Angelina Jolie a kawp chhoh lai vel a ni a, a nupui  Jennifer Aniston a ṭhen kum a ni bawk - tunah chuan Angelina pawh a ṭhen fel leh der tawh!

Nia, kum 2005-ah kha chuan Galacticos hming chawiin Zinedine Zidane, David Beckham leh Ronaldo te pawh Real Madrid tan a la khel ho a, tunah chuan Zidane hi Real coach a ni a, Beckham-a'n MLS club a nei a, Ronaldo pawhin La Liga club Real Valladolid-ah 80% share hial a nei ta. 

June 11, 2005 kha ring chhunga Tyson-a luh hnuhnun ber a ni a, a chuai tawh lam a nih avangin Irish boxer naran tak Kevin McBride a hneh lo - a hmachhawn tur Jones erawh February 2018 pawh khan a la inhnek a, Scott Sigmon a hneh. 

Kum 45 mi nia heavyweight champion upa ber record lo siam tawh George Foreman chuan, "Thil hlauhawm tak an ti dawn tih hrilh ka duh a, mahse an ngaihthlak duh erawh ka ring lo," tiin kum 50 chuang tawh boxer pahnih tan a harsa dawn niin a sawi. 

Bernard Hopkins chuan, "Mike hian a vanglai hun hmang mek ni ta se heavyweight-a kawnghren awm zawng zawng hi chu a kawl vek ang," a ti a, Anthony Joshua leh Tyson Fury tan el phak a nih loh thu a sawi - Hopkins hi kum 48 mi ni chunga boxing khawvela champion upa ber record lo siam tawh a ni. 

Hetihlai hian WBA, WBO leh IBF title kawltu Joshua chuan, "Engkim a ṭha zawk vek kan dawng tawh a, kan taksa thlengin a lian ṭha tawh zawk. Infiamna khawvel hrim hrim hian thil ṭha zawk kan neih tawh avangin tun hma nena khaikhin chi a ni lo," a ti a, Tyson leh Jones chu a duhsakna a hlan rualin tunlai infiamna hrethiam turin a chah. 

Tyson leh Jones-a inhnek turin titi a luah a, hetiang boruak karah hian inhnek phalna petu California State Athletic Commission executive director Andy Foster chuan boxer pahnih inhnek tur avanga mipui phur lutuk tur beng daih nan ṭawngkam a nei. 

Foster chuan, "Mipuiin an nghahhlelh kan duh avang maiin he fight hi ropui taka sawi kan tum lo a, fight tak tak ang a ni dawn lo. Theihtawp chhuah loh a har ang tih ka ring a, mahse an inhliam nat lutuk loh nan kan ven a ngai ve bawk a ni," a ti. 

CSAC hotupa chuan boxer pahnih chuan professional fight-a glove an bun ṭhin aia lian an bun tur thu a sawi tel a, ring bulah judge an awm loh tur thu leh knockout phal a nih loh thu a sawi bawk. 

Phur lo thei lo

Andy Foster-a'n Tyson leh Jones-a inhnek tur sawi 'hot' loh deuh tum mah se boxing fans tam tak an phur laklawh a, champion hlui pahnih inhnek tur an nih avangin an tih mai mai an rin loh thu social media lamah an tarlang nasa hle. 

Hriat tel tur chu amateur boxing-ah hian round thum an inhnek ṭhin a, round khatah hian minute thum zel a awm -Tyson leh Jones hi round riat an inhnek dawn a, thisen a 'lum' dawn tih a chiang. Jones hi WBA interim middleweight title kawltu leh IBO super-middleweight title kawl mektu Chris Eubank Jr-a trainer ni lai a nih avangin a tha a za ang tih a chiang a, Tyson hi social media lama a training lai aṭanga teh tur a nih chuan hmana 'Iron' Mike kha a la ni reng. 

NBA player hlui Nate Robinson chuan a vawi khat nan boxing ring chhung a rap dawn a, a hmachhawn tur hi youtuber lar Jake Paul a ni - boxer pahnih hi Tyson leh Jones inhnek hmain an inhnek ang. 

Kum 23 mi Jake Paul hian February khan a vawi khat nan inhnek a lo hmachhawn tawh a, amah ang thoa youtuber lar AnEsonGib chu a hneh a ni - NBA player hlui Robinson a hmachhawn leh dawn ta. Paul-a hmachhawn tur Robinson hi kum 36 mi a ni a, Chicago Bulls, Golden State Warriors leh Boston Celtics tan pawha lo khel tawh niin kum 2016 hnuah NBA-ah a inlan leh tawh lo thung - NBA star ni phak khawpa basketball thiam bik a ni a, boxing-a a dinhmun tur hriat a châkawm hle.