Argentina hun a inher chhuak leh ta

Argentina-in a lungthu kim nan FIFA World Cup nomawi an chawi ta a, Lionel Messi hoa nomawi an chawi hma hian kum 1978 leh 1986 khan khawvela football inelna ropui ber nomawi hi an lo chawi tawh. La Albiceleste kawr hmaa 'national football logo' chungah arsi pathum a chuang tawh ang.

Football ram ropui zinga chhiar hmaih thiang lo Argentina hi La Selección (National Team) tiin an ko a, La Albiceleste an ti bawk. FIFA World Cup-ah Argentina-in nomawi an chawi leh tak avangin sulhnu nei ṭha palina an ni ta a, an tluk loh chu vawi nga champion tawh Brazil bakah vawi li champion Germany leh Italy te chauh an ni.

World Cup vawi 22 neih tawhah Argentina hian final vawi ruk an lut tawh a, inelna neih hmasak ber kum 1930-ah pawh khan final lutin an champion zo ta lo. Kum 1978 khan Daniel Passarella captain-na hnuaiah an champion a, kum 1986 khan Diego Maradona captain-na hnuaiah champion lehin kuminah Lionel Messi captain-na hnuaiah an champion.

Argentina hi football thiam ram an ni tih nemnghettu chu South America ram tana inelna lian Copa America-ah pawh sulhnu an nei ṭha a, vawi 15 champion tawhin Uruguay nen champion tam lamah record an siam.

Mak ang reng tak erawh Diego Maradona khan Copa America a champion pui miah lo a, kum 1991 leh 1993-a Argentina an champion khan a tel lo. Kum 1993 hnu khan Argentina hi ṭum li final-ah a vanduai zawkah an ṭang a, nikum khan final-ah Brazil hnehin an champion - Messi a ropui hle.

Messi hian Copa America leh World Cup-ah Argentina a champion a ni ringawt lo a, record ṭhahnem tak a hnutchhiah tel. PSG forward Messi hi Argentina tana khel hnem ber (172) leh goal khung tam ber a ni a, statistics-in a sawifiah theih loh lai chu mi bik a nihna hi a ni. Khawvela football khelh a nih chhung chuan Messi hming hi a dai tawh lo ang.