1978 : Argentina-ah Argentina an champion

19th December, 2022

Argentina-in kum 1930-a neih FIFA World Cup inelna hmasa berah final lut mah se an che ṭha chhunzawm lo a, 1966-a quarterfinal an thlen chu an thlensan leh ber a ni. Hei chauh hi a ni lo - kum 1970-ah phei chuan an inpettling zo lo a, kum 1974-ah second round bak an thleng lo.

Kum 1978-ah Argentina hian a vawi khat nan FIFA World Cup an thleng a, inelna an thlen hma kum hnih liam taah Argentina hi sipai rorelna hnuaiah awmin insiamrem nan hun an nei tlem hle.

Argentina hi César Luis Menotti-a'n a enkawl a, ani hi Lionel Messi ang thoa Rosario-ah a piang. Menotti hi a inkhelh hun laiin striker a ni a, Boca Juniors tan pawhin a khel tawh. October 1974 khan Argentina hi a enkawl ṭan a, an ram a champion hnu hian Barcelona, Atletico Madrid, River Plate, Boca Juniors leh club hrang hrang a enkawl zui a ni.

Hei chauh hi a ni lo, Menotti hi January 2019 khan Argentina national team-ah director atan lakluh a ni a, tun ṭuma an champion-naah pawh hian tha a thawh a tih theih ang.

Kum 1978 khan team 16 an tel a, Argentina hi Italy, France leh Hungary te nen group khatah an awm. La Albiceleste hian Hungary leh France chu 2-1 ve vein an hneh a, group match hnuhnung berah Italy 1-0 in hneh lo mah se second round an lut ta tho.

Second round-ah Argentina hi Brazil, Poland leh Peru te nen an awm ho. La Albiceleste hian match hmasa berah Poland chu 2-0 in an hneh a, goal hnih khungtu hi Mario Kempes a ni.

Argentina hian an hmelma leh football ram ropui Brazil an hmachhawn leh a, goal awm loin an inhnehtawk. Group match hnuhnung berah Peru 6-0 in an sawp a, Kempes-a'n goal hnih a khung leh bawk.

Brazil leh Argentina ten point nga ve ve hmu mah se goal difference nei ṭha zawk La Albiceleste-in final an lut. Nomawi inchuhna hi Buenos Aires-ah neih a ni a, entu mipui 71,483 hmaah mualneitu hian Netherlands chu 3-1 in an hneh. Hun pangngaiah 1-1 in an inhnehtawk a, extra time-ah Argentina an chungnung ta zawk. Final-a goal hnih khungtu Kempes hian inelna pumpuiah goal rukin khungin top scorer a ni a, best player-ah thlan a ni tel bawk.