1986 : Maradona hun - Hand of God & Goal of the Century

César Luis Menotti hnuaiah Argentina-in World Cup nomawi an chawi a, chutihrualin Menotti hian kum 17 mi Diego Maradona chu a la naupang hret avangin a tel lo. Maradona hian Menotti hnuaiah February 27, 1977 khan Hungary an hmachhawn ṭumin ram tan khel mah se World Cup-ah a tel ta lo.

Kum 18 mi Maradona chuan 1979 FIFA World Youth Championship-ah ram tan a khel ta zawk a, inelna hi Japan-ah neih niin Argentina chu a champion pui. Maradona hi best player-ah thlan a ni a, 1982 World Cup-ah hmaih a thiang ta lo.

Argentina hian second round lut leh mah se semifinal an thleng phak ta lo. Italian player Claudio Gentile chuan tharum nen Maradona a, Gentile chet dan hi uchuak hret mah se a tum ber a hlawhtling. Italy-in 1-0 in Argentina an hneh a, Menotti hoten nomawi an chawi nawn thei ta lo.

Kum 1986-ah World Cup inelna chu Mexico-ah neih a ni a, Argentina tan Maradona chu captain a ni tawh a, coach pawh Carlos Bilardo a ni tawh thung.

Argentina hi Italy, Bulgaria leh South Korea te nen an awm a, Maradona hian Azzurri nen 1-1 an inhnehtawk ṭumin goal pawimawh a khung. La Albiceleste hian group-a an awmpui dang South Korea (3-1) leh Bulgaria (2-0) te an hneh.

1986 World Cup-ah hian team 24 an tel a, second round pawh a vawi khat nan knockout hmanga khelh a ni. Last 16-ah Argentina-in Uruguay chu 1-0 in an hneh a, quarterfinal-ah Argentina-in England hmachhawnin Maradona chu a chungnung fal hle.

Maradona hian minute 51-naah amah aia inches riata sang keeper Peter Shilton aiin ball a khawih hmasa zawk a, goal hlu bik a khung. Referee Ali Bin Nasser chuan goal-ah a pawm a, amaherawhchu Maradona hian a lu hmang loin thiam takin kut vei lam hmangin a chum lut. Inkhelh zawhah Maradona chuan, "Maradona kut tlem, pathian kut tlem a ni," tiin a sawi a, he goal hi Hand of God tiin a lar zui.

Minute li hnuah Maradona hian ropui a khung leh zui a, hei erawh sawisel bo a ni. Argentina captain hian yard 60 aṭangin ball a khalh ṭan a, English player pali Peter Beardsley, Peter Reid, Terry Butcher (vawi hnih) leh Terry Fenwick te chu bumin goalkeeper Peter Shilton a bum leh a, goal ropui a khung. He goal hi goal of the century vuah a ni.

Argentina hian England hi 2-1 in an hneh a, semifinal-ah Maradona goal hnih hmangin Belgium an hneh leh bawk. Final-ah Maradona hi inkhelh chhung zawngin Lothar Matthäus-a'n a veng. Mahse, minute 84-naah Maradona pass chu Jorge Burruchaga-a'n goal-ah a chantirin Argentina hi 3-2 in an chak. Maradona hi a phu ang ngeiin best player-ah an thlang.