Messi aia thiam an awm lo

Lionel Messi-a'n, "Ka World Cup match tawp ber tur a ni," tia a sawi, a World Cup match hnuhnung berah champion nomawi a chawi a, World Cup Golden Ball a dawng tel nghal bawk - a phuzia inhrilh nawn a ngai lo.

Messi hian World Cup fi nal meuh pawh a 'magic' show nan a hmang a, hmuhnawm ti takin khawvelin a thlir a, Lionel Messi che vel hmuhnawm ti lo fa a awm theih lo ang.

Argentina captain hian tun World Cup-a an match zawng zawng zawng a khel kim vek a, goal sarih khungin, assist vawi thum a nei a, a hming ropui fakin khawvelin a chawimawi a nih hi.

World Cup 2014-ah pawh Best Player atana thlan lo ni tawh Messi hian World Cup-a an match hmasa bera Saudi Arabia an hmachhawn ṭumin penalty a chhuih lut a, mahse, mak tak maia 2-1 a an tlawm avangin sawisel an tawk nasa.

Mahse, Argentina tan tluk hlen a thiang lo a, Messi tan tluk hlen a thiang lo. Match hnihnaah Mexico chu 2-0 in an hneh a, Messi-a'n goal a khung bakah assist a nei a, Poland (2-0) an hnehna inkhelah erawh goal a khung lo.

Round of 16-ah Argentina-in 2-1 in Australia an hneh a, he inkhel hi 'Messi show' tiin sawi ila, a awm lo hran lo - goal ropui bik a khung. Quarterfi nal-a Netherlands an hmachhawn ṭumin Messi-a'n goal a khung bakah assist a nei tel a, 2-2 a an inhnehtawk hnuah penalty hmangin an chak.

World Cup semifinal meuh pawh Messi ropuizia hmuhna mai a ni. Argentina-in 3-0 in Croatia an hneh a, Messi-a'n penalty aṭanga a pet goal bakah duhthala Croatia defender ṭhangduang Josko Gvardiol a lam khum hnuah, Julian Alvarez goal hnihna tur a siamsak zui.

Tin, Pathianni zan a ni a, Lusail Stadium-ah Messia'n khawvel mipui hmuhah magic a 'show' leh a, penalty hmanga goal hmahruai a khung hnuah minute 108-naah goal pawimawh a khung leh a, khelmualah a hmuhnawm em em bawk. Penalty Shootout-ah 'cool' takin Messi hian a khung a, a tawpa a hlawhchhuah chu World Cup nomawi leh Golden Ball a ni - khawvelin he footballer hi a theihnghilh tawh lo ang.