Lajong-in AFC kulh an ṭhiat

Aizawl FC-in Rajiv Gandhi Stadium-ah I League match 10 chhung hneh loh an tawng tawh lo a, an record duhawm tak hi Shillong Lajong lakah an hum zo lo.

Nimin tlai khan Shillong club hian minute 60-naa Radeem Tlang-a goal hmangin Mizo club an hneh a, Khasi tlangval Redeem hi hero of the match-ah thlan a ni.

Shillong Lajong-in point 10 an hmu a, hmahruaitu Minerva Punjab nen vawi li khelhah an point hmuh zat a inang.

Minerva hi Aizawl FC hmachhawn leh tur an ni a, nizan khan Indian Arrows nen inkhelin result kan hre hman lo.

Mizo club erawh match thum khelhah point li chiah hlawh chhuakin kai thar Manipur club Neroca FC hnuaiah an awm a, parukna dinhmun luah mek mah se nizan inkhelah Indian Arrows-in Minerva an hneh chuan pasarihnaah an tla thla ang.

David aiah BT-a

Aizawl FC ṭantuten Andrei Iones­cu an hmu châk a, Romanian midfielder hian Inrinni aṭangin training zawm tawh mah se inhliam David Lalrinmuana thlak tur leh bul ṭan tur khawpin a la dam lo. Zemabawk North tlangval David aiah hian match hmasaa amah thlaktu H. Lalbiakthanga chu dahluh a ni.

Portuguese coach Paulo Meneses-a'n Churchill Brothers hnehtu starting eleven aṭangin pakhat chiah a thlak danglam. Bench aṭanga lut thei turin Andrei bakah Shillong Lajong nena an inkhelh hnuhnun bera goal khungtu William Lalnunfela chu dam leh tawhin bench-ah dah a ni bawk.

Shillong Lajong tan Mohun Bagan nena goal khungtu captain Samuel Lalmuanpuia chu starting eleven chang turin a dam hman lo a, a aiah Khasi rawlthar Shaiborlang Kharpan an dah lut. Mariners nena bul ṭan Assamese winger Alen Deory aiah Khasi rawlthar tho Kynsailang Khongsit chu a tir aṭangin a inlan a, starting eleven-ah pahnih an tidanglam.

Tlar hma bil

Aizawl FC-in ball thiam pahnih David leh Andrei an chhawr theih loh avangin Shillong Lajong tlarhnung an ṭhiat thei lo a, ball chang tam siin an su tlang thei lo. Churchill laka chakna goal khungtu Yugo Kobayashi hmuh tur a awm meuh lo a, Japanese striker a ṭangkai tam lo hle.

Lajong lam pawhin game nung tak an lantir thei bik lo a, inkhel dul takah Lajong striker Aiman Al-Hagri chuan Afghan defender Mashi Saighani tihsual nangchingin keeper Avilash Paul chiah a hmachhawn a, AFC keeper hian a dan sak.

Second half

Goal lut loin halftime an hmang a, second half-ah Lajong-in bul an ṭan ṭha zawk. Minute 60-naah Yemeni midfielder Al-Hagri pet chu Masih-a'n a dang hman mahse a per chu Redeem tan duhthusam a ni a, Khasi tlangval hian keeper Avilash dan hman loh turin goal kilah a khung.

Aizawl FC-in Andrei an dah lut a, I League danah foreigner panga chiah playing XI-ah chhawr theih an nih avangin Romanian midfielder luh hma hian defender Kareem Omolaja Nurain chu kumin National Junior C'ship-a best player Hmingthanmawia'n (Valpuia) a thlak.

Andrei luh hnuah AFC game nung hret mah se Lajong-in goal venhim hna an thawk tawh a, counter attack-a an innghah tawh avangin engkim a harsa tawh.

Mizo club-in goal chance ṭha an insiam thei lo a, H. Lalmuankima chu penalty beiseiin box chhungah tlu mah se pek a ni lo a, Japaneses striker Yugo-a pet goal zawnah a kal lo a, Aizawl FC-in goal an khung thei lo a, goal chance ṭha bik an insiam lo.

AFC coach Paulo chuan, "Penalty pek kan ni lo a, a awm lo takzet. Vawi li vel chu penalty pekna awmah pek kan ni tawh lo. I League-ah meuh chuan referee ṭha ka beisei," tiin inkhelh zawhah a lungawi loh thu Vanglaini a hrilh.

Phurna tlahniam

Aizawl FC player-ten khelmualah chak châkna an nei tawk lo niin a lang. Mizo club hian Shillong Lajong aiin hahdamna hun ni khatin an ngah zawk a, Lajong hian AFC an hmachhawn hmain Kolkata club pahnih East Bengal leh Mohun Bagan an hmachhawn a, hemi zawha Mizoram rawn pan chauh an ni.

AFC hian I League squad tho chhawrin Mizoram Premier League-ah an champion tawh lo a, Lajong nena an khelh dan thlirin insiamṭhat an mamawh hle.

Entu lam pawh season hmasa lam aiin nasa takin an tlahniam a, Rajiv Gandhi Stadium-ah ṭhutna ruak a tam hle.

Mizo club-in I League nomawi humhim an tum a nih chuan khelmual pawn leh chhungah insiam-ṭhat an mamawh a, result ṭha neih turin phurna neih let a pawimawh ang.

Insiamṭhat ngai AFC

Aizawl FC coach Paulos-a'n insiamṭhat an ngai tih a pha lo a, hnehna chan phu zawkin hnehna an changah erawh a ngai lo.

Portuguese coach chuan Vanglaini palai zawhna chhangin, "Goal khung tumin kan bei a, inkhel thununtu zawk kan ni. Shillong Lajong khan chak an phu-ah ka ngai lo a, an hun ṭha neih chhunah an vannei mai zawk a ni," a ti. Inzir belh tur an neih thu sawi nghalin, "Tlarhmaah kan hriam tawk lo nia in sawi hi ka pawm a, ka naute khan an theihtawp erawh an chhuah a, kan inzir belh zel ang. Naktuk aṭangin training kan ṭan leh nghal ang a, Minerva Punjab lo zin hunah tlawm kan duh tawh lo," a ti.

Shillong Lajong coach Bobby Nongbet erawhin chak phu zawk an chakah a ngai a, Khasi coach chuan, "Point thum hmuh phu zawk team-in hnehna kan chang. Aizawl FC khan an khel ṭha em em a, mah se vawiinah erawh chu mi dang chat tur chuan kan khel thei a ni. Team ṭha pahnih kan inhmachhawn a, vawiina chungnung zawk chu kei ni kan ni," a ti a, champion sawi nan a la hma thu a sawi bawk.

Hero of the Match-a thlen Redeem Tlang chuan Vanglaini zawhna chhangin, "Team ṭha tak laka hnehna chang kan nih avangin ka lawm a, ka khelh danah pawh ka lawm. Hma hun thui tak sawi ka duh lo a, kan match hmabakah chiah zel kan rilru kan dah a ni," tiin a sawi ve bawk.

ZoFooty Statistics
Aizawl FC 0- 1 Shillong Lajong
SLFC : Redeem Tlang 60'
MoM : Redeem Tlang, SLFC
60% Ball Possession 40%
13(4) Shots (On Target) 11(5)
482(356) Pass (Completed) 295(193)
11 Fouls 11
2 Offside 1
5 Corner Kick 2
2 Yellow Card(s) 2
0 Red Card(s) 0
Powered By
Darchiauva Hardware, Mission Veng