AFC 'C' License course zo

Kar hnih chhung awh Asian Football Con­fede­ration 'C' License course chu December 17 zan khan Rajiv Gandhi Stadium, Aizawlah zawh­ fel a ni.

Mizo football coach, 'D' License nei tawh­te leh state pawn atanga rawn kal, an vaiin mi 19 ten kar hnih chung football coaching an zir hnuah Exam ziakin an zo fel a ni.

Course kaihruaitu, AFC Pro license nei, footballer hlui leh India coach lo ni tawh Savio Madeira, tuna AIFF Technical Director chuan kar hnih chhung hian coach-te chu football coaching pawimawh hrang hrang chipchiar takin a zirtir a. Lehkhabu bakah video leh a taka inkhelh nen chawhpawlhin, uluk takin amah puitu Gumpe Rime nen he course hi an kaihruai a ni.

Pathianni zana kharna in­khawm tawi buatsaihah Savio chuan India rama football kalphung tihchangkanna kawngah coach-te pawimawhzia a sawi a. Course a kaih­hruai dan pawh a uluk hle thu te, ho-lam taka tih a duh loh vanga a chang chuan nelawm lo tak pawha a awm ṭhin thu te a sawi a. Chung zawng zawngah chuan coach te hriatthiamna a beisei thu sawiin, tun tuma hlawhtlinna chang lote pawh beidawng lo turin a chah nghal bawk.

Inkhawm kaihruaitu MFA Hony secretary Lalnghinglov Hmar chuan Savio an a intiam ang taka Mizorama course a rawn buatsaih chu lawmawm a tih thu a sawi.

MFA vice president Lalsawma Pachuau pawhin Mizoramin he course a thleng chu lawm­­awm a tih thu sawiin, coach-te chu an pawimawh zia hre turin a chah a. AIFF in Mi­zo­­ram a coaching course pawi­mawh a nghah avangin lawmthu a sawi bawk.