Footballer ropui Kaka a chawl ta
"Ka Pa, ka dai phak loh tur ram min dai tir a. I chungah ka lawm e! Tunah chuan zinkawng dang zawh turin ka inpeih leh ta. Isua hmingin. Amen" tiin khelmual pawn leh chhunga Krista nunpuitu Kaka chuan football a chawlhsan thu a puang.
Kum 35 mi midfielder hian Major League Soccer club Orlando City lamah a hun hnuhnung a hmang a, October khan MLS season chu a tawp tawh - MLS season tawp rual hian inkhelh a chawlhsan dawn nia sawi a ni a, Milan-ah director hna a thawk dawn nia sawi thlengin a awm. Thu chiang a awm loh reng hnuah amah ngeiin a chawlh tur thu a puang ta a ni.
Mi bik Kaka
Football khawvelah World Cup, European Cup/Champions League leh Ballon d'Or dawng kawp vek thei player pariat chiah an awm a, chung zingah chuan Kaka a tel.
Brazilian midfielder bakah hian player ropui Bobby Charlton, Gerd Muller, Franz Beckenbauer, Paolo Rossi, Zinedine Zidane, Rivaldo leh Ronaldinho te chuan football khawvela nomawi leh mimal chawimawina ngaihhlut pathum hi an lo dawng ve tawh bawk.
Ball thiam, finishing tawih leh ṭhiante tana goal khung tur siamsak a thiam avanga hriat hlawh footballer hian Brazil tan match 92 a khel hman a, goal 29 a khung - kum 2002 khan an ram hi World Cup nomawi a chawipui hial.
Milan legend
Kaka vanglai chu kum 2003-2009 inkara AC Milan tana a khelh lai kha a ni. Italian club tan hian kum 2004 khan Serie A nomawi a chawi a, kum 2007-ah Champions League nomawi chawipuiin he mi kum vek hian Club World Cup-ah an champion tel.
Brazilian attacking midfielder-in mimal chawimawina a dawn zawng zawng ziak vek dawn ila, kan hun leh hmun neihin a daih lo - a langsar zual zingah kum 2007 khan FIFA World Player of the Year leh Ballon d'Or chawimawina a dawng kawp a, Serie A Footballer of the Year (2004, 2007) chu ṭum hnih dawngin FIFPro World XI (2006, 2007, 2008) leh UEFA Team of the Year (2006, 2007, 2009)-ah a lang bawk.
Real zinkawng
June 2009 khan Milan fan-te atchilh rawn Kaka-a'n amah hmangaihtu leh a hmangaih em em Italian club hi a chhuahsan a, a hunlaia footballer manto ber ni turin Real chuan pound maktaduai 56-in an lei. Spanish club-ah season li hun a hman chhungin Copa del Rey leh La Liga nomawi a chawi.
Khup hliam vanga a buai reng hnuin Kaka hian 2013 khan Milan chu loan-in a zawm a, season khat a khelh hnuah US lam panin Orlando City a zawm - MLS lamah pawh player langsar pawl a ni nghal a, season thum a cham chhungin MLS All Star-ah a lang kim vek!
Mangṭha Kaka, Mangṭha Legend!