Zaninah League Cup quarterfinal Man City tan nomawi a pawimawh

Zanin hi England-a football knockout inelna pakhat English League Cup quarterfinal khelh hun a ni a, tun hmain Premier League club ten he inelna hi ngaihlu tawk ṭhin lo mah se tun hnuah erawh nomawi chawi a harsat avangin ngaih pawimawh a ni.

Pep Guardiola hnuaia nomawi la chawi lo Manchester City chuan King Power Stadium-ah Leicester City an hmachhawn dawn a, Arsenal-in Emirates Stadium-ah West Ham an mikhual ang. Kumin hian sponsor hming chawiin Carabao Cup tih a ni a, team 92 telnaah pariat chiah an dam tawh.

Inelna champion lai Manchester United chuan naktuk zan hian Bristol City an tlawh dawn a, Chelsea-in Bournemouth an mikhual thung dawn. Quarterfinal-ah Premier League-a la khel lai zinga league-a champion thei panga United, Arsenal, Chelsea, City leh Leicester City te an la dam vek a, hei hian kumin League Cup a ti hlu sawt ang.

Nomawi a pawimawh

Manchester City-in match 16 chhung Premier League-ah an khingpui an hneh zawn tawh a, khelmual chhungah inkhel an thunun ṭhin bawk avangin club neitute manager Pep Guardiola chungah an lungawi hle. English club hian Spanish manager hi chelh tumin an dawr dawn a, thuthang leng velah chuan contract hlut zawng hi pound maktaduai 80 vel tur niin khawvel football manager hlawh tam ber a ni thei dawn tihna a ni.

Tun dinhmuna coach hlawh tam ber chu China national team enkawltu Marcello Lippi a ni a, Pep hian City contract zawrh tur hi a pawm a nih chuan khawvel football manager hlawh tam ber a ni let leh thei dawn nia sawi a ni. Pep-a contract neih lai hi kum 2019-a tawp tur a ni a, amaherawhchu City hian an hmelma Manchester United sulhnu chhui a, Sir Alex Ferguson-a hnuaia an record chhuanawm tak chu Pep-a hoa tih ve theih an inbeisei a ni.

Amaherawhchu, Spanish manager hnuaiah City hian nomawi an la chawi lo. Season liam ta khan Premier League-ah pathumna an ni a, FA Cup-ah semifinal-ah an tla a, Champions League leh League Cup-ah last 16 bak an thleng lo bawk. Kumin hian Premier League nomawi an chawi ngei hmel a, nomawi dang erawh knockout a nih miau avangin a awlsam lo ang.

Pep-a chanchin an sawi apiangin Barcelona a enkawl laia a ropui zia sawi a ngai a, hemi chhunzawmna erawh kum thum chhung Bayern Munich a enkawl chhungin Champions League nomawi a chawi lo tih a ni a, City-a a nomawi chawi zat hi an sawi leh tur chu a ni.

Inkhel tur chu

Leicester City-in an coach thar Claude Puel hnuaiah result ṭha tak an nei a, match kua an khelh tawhah vawi 9 chakin vawi hnih chiah an chak lo. An record thlirin chhuanawm mah se Foxes hian an match hnuhnung berah erawh Crystal Palace lakah 3-0 ngawtin an hneh lo a, Man City hneh tur chuan rin an harsa khawp ang.

Leicester hian kartawp hian league-ah Manchester United an hmachhawn lehnghal dawn a French manager Puel-a'n thutlukna a siam thiam a pawimawh dawn–League Cup semifinal thlen nan match khat chiah a awm nachungin an khingpui tur hi City an ni tlat. Foxes hian risk an lak ngam erawh chuan beisei tur a awm thei ang.

City coach Pep Guardiola hian huaisen takin player naupang zawk leh khel tlem zawk enchhin nan a hman a rinawm a, chuvangin FIFA Under 17 khelh zawh taka golden ball dawngtu Phil Phoden pawh a inlan theih beisei a ni. Krismas vuaketah inkhel tur a tam avangin inkhel bul ṭantu zingah erawh Claudio Bravo, Brahim Diaz, Yaya Toure leh Bernardo Silva te hmel hmuh a beiseiawm.

King Power Stadium-ah hian 2013-14 season khan League Cup quarterfinal-ah bawk an inkhel tawh a, City 3-1 in an chak. Premier League lama an intawnna hnuhnung pahnihah pawh City bawkin hnehna an chang a, Pep Guardiola hote hi an chak zo lo a nih chuan upset a tih theih ang.