Zaninah title fight

Gionee LPS Pro Fight 2017 Title Fight chu zanin hian R. Dengṭhuama Indoor Stadium, Mualpuiah neih a ni dawn a, dar 7:30-a ṭan tur niin inhnek panga a awm ang.

Lightfly

Champion lai NT Lalbiakkima'n a vawi thum nan lightflyweight title a humhim a nih chuan LPS Pro Fight chanchina champion zawn rei ber record a nih rual dawn a, amah chotu F. Zoramchhana lakah rin kai ni chungin a khel ang.

Siaha fighter Biakkima hian inven aiin lehlam nawr ngar ngarin a bei ṭhin a, thiamna ṭha tak a neih bakah a kut rang hle. Kum 2014 aṭangin Pro Fight a khel tan a, a tumpui apiang a la hneh vek.

Cherhlun chhuanvawr Zotea'n kuminah rahbi lian tak tukin hmasawnna ropui a lantir ve thung a, a hma zawngin Pro Fight-ah hriat a hlawh lova nikum khan round of 16 khelin a thlen san ber a ni.

Bantam

Zonuntluanga'n a vawi khat nan title humhim a tum dawn a, HC Lalramfela a hneh a nih chuan bantamweight-a a zawna champion thei hmasa ber a ni ang.

Dinthar fighter Zonuntluanga hian nikum khan hun ropui a hmang a, champion lai Ramfela kut aṭangin kawnghren a laksak a, a vawi khat nan champion-in Best Boxer-a thlan a ni bawk.

Title Fight panga awm tur zingah Zonuntluanga leh Ramfela inhnek tur hian ngaihven a hlawhin, inbeitawk hle tura ngaih an ni. Assam Regiment boxer Zonuntluanga'n a tumpui nawrin vawi tam tak a hnek chhuak thin a, phui taka inveng chungin Ramfela'n na takin a khingpui a nawr thei bawk a, kuminah kawng hrang hrangin hma a sawn.

Light

Champion lai Anthony Lalduhawma'n harsatna a neih avangin Title Fight a khel thei dawn lo va, lightweight champion thar nih tumin C. Lalrosanga leh Lalrinawma an inbei dawn.

Pro Fight-a tawn hriat an neih tawh aṭangin kum 25 mi Rinawma'n hnuhma a nei ṭha a, champion la ni lo zinga hriat hlawh ber pawl niin Title Fight a hmachhawn vawi thumna tur a ni a, a vawi khat nan hlawhtlinna chang turin a inringtawk hle.

Govt Complex boxer Rinawma hian 2014 leh 2015 khan Lalmuanpuia hneh lo ve vein Title Fight-ah a tlawm. Light-ah hian champion thei pahnih chiah an la awm a, Lalmuanpuia leh champion lai Duhawma'n vawi thum ve ve title an la tawh a, an pahnihin kuminah an tel lo va, Rinawma'n atan hun tha a inher chhuah a beisei.

Middle

Pro Fight middleweight boxer hlawhtling ber Zarzoliana'n a vawi nga nan Title Fight a hmachhawn dawn a, Lalnithanga lakah a tum li nan champion turin rin a hlawh zawk.

Kum 2010 aṭangin middle telh a ni a, champion hmasa ber Zotea'n 2011-ah title a humhim; 2014 khan hliam vangin Title Fight a khel tluan thei lo va, HC Johnkenty Vanhlimpuia lakah kawnghren a hloh. Mahse, nikumah kir lehin Title Fight-ah C Lalduhawma a knockout.

Sawleng superstar lakah Chhingchhip boxer Nitea'n a tawn ngai loh inhnek ropui a hmachhawn dawn. Pro Fight a vawi khat khelhnaah Title Fight turin a inlan thei nghal a, a thlen chin hi atan hlawhtlinna ropui a ni tawh. Mizo boxer tha ber pawl Zotea hmaah fiahna danglam leh harsa a hmachhawn dawn.

Lightheavy

Pro Fight weight hrang pahniha champion thei awm chhun HC Johnkenty Vanhlimpuia'n a vawi khat nan lightheavyweight title humhim a tum dawn a, amah chotu Lallawmkima Sailo nen an innuai ang.

Mizo boxer zinga mipui hip em em Vana'n kawng hrang hrangin rin a hlawh a, khan sang leh ban sei zawk a nih bakah thiamna tha tak leh a kutthlak hlauhawm tak bakah tuan rang zawk ni chunga a khel thei a nih chuan Lawmkima tan chet a harsat hle dawn a ni.

Tuipui star Vana hian 2014 atangin hriat a hlawh tan a, tute mahin Pro Fight-a an la hneh loh Zarzoliana kut atangin middleweight title a laksak. 2015-ah harsa lo takin kawnghren a humhim a, nikum kha middleweight title kalsanin lightheavy-ah a insawn.

Kum 24 mi Lawmkima'n rin kai zo lo mah se a khelh hnuhnun berah fighter nghet leh tlo a nihzia a lantir a, amah aia rin kai leh hriat hlawh zawk H Lalrinhlua a hneh. Title Fight a khelh hmasak berah Chaltlang Lily Veng fighter hian mipui barakhaih a tun a, ruahmanna tha tak a nei thei a nih chuan fei bei turin theihna a nei.