Barcelona dang thei an la awm lo

Spanish La Liga-ah Barce-lona-in anmahni dang theitu an la tawng lo. Pathianni zan khan an mikhual Deportivo La Coruna chu 4-0 in an sawp - Barca tan Luis Suarez leh Paulinho chuan goal hnih ve ve an khung a, anmahni hnaih bertu Atletico Madrid aiin point rukin an sang fal tawh.

Barcelona thiampuipa Lionel Messi vanneih zan a ni lo. Argentine forward hian vawi thum ngawt woodwork a pet per a, penalty a pet goal lo bawk - assist erawh vawi hnih a nei tho a, 'Nil' tia han sawi tur erawh a ni lo.

Inkhel chu

Nou Camp-a inkhelah Barca tan Suarez chuan goal hmasa ber a khung a, Messi ball pek duhthusam chu Uruguayan striker hian awlsam takin a chhuih lut. Minute 41-naah Paulinho a inlar ve thung a, an goal hnihna a khung - hei pawh hi Messi ke aṭanga chhuak tho a ni. Argentina captain hian bar a pet per a, ball let lehlam chu Brazilian midfielder hian chiang zetin a lo khung.

Goal dang lut loin chawlhlawk hman a ni a, chawlhlawk hman a nih hnuah pawh Barca tho an chungnung - Suarez bawkin goal a khung leh a, hnai set sawt aṭangin minute 47-naah an goal thumna a khung. Paulinho vanneih ni a ni a, Brazilian midfielder hian Messi bar tih per aṭanga goal a khung hnuah Jordi Alba post pet perna aṭanga ball let lehlam chu goal-ah a chantir.

Messi 'loh' day

Barcelona-in an goal lina an khung hmain penalty an hlawh chhuak a, goal hnih khung tawh Suarez chu penalty box chhungah Federico Valverde-a'n a tih tluk avangin Uruguayan striker hian penalty hi a hlawh chhuak - Liverpool striker hlui tan hattrick siamna hun remchang tak ni mah se Messi tan a kian.

Woodwork vawi thum ngawt pet pertu Messi vanneihna zawngin a lo pen chhuak a, mah se Argentina captain a 'Messi' loh zan a ni tlat - Deportivo goalkeeper Ruben Martinez-a'n a dan sak a, league goal 14 a khung tawhah goal dang a belh thei rih lo.

PaulinGOAL

Tottenham Hotspur-ah Paulinho a hlawhchham a, Chinese Super League club Guangzhou Evergrande a zawm. CSL lamah che ṭha mah se a league 'level' dah san a har a, Barca-in nipui transfer-a pound maktaduai 36-a Paulinho an lei kha football khawvelin mak a ti - mah se Brazil international hian Barca-ah hmun pawimawh changin player ṭha a nihzia a pholan chhunzawm zel a, tun season-ah Catalan club tan goal ruk a khung tling ta.

Kartawp La Liga-ah Club World Cup Final khelh vangin Real Madrid an inlan lo a, khelh khata khel tlem zawk chunga Barca an phak lohna chu point 11 lai a ni tawh - December 23 zanah club pahnih hian El Clasico an khel dawn a, Real tan Barca umphak tura an point chhuhsakna hun remchang a ni ang.