Sindhu tan silver medal

Indian shuttler PV Sindhu chu uiawm takin final-ah a vanduai leh ta. Pathianni khan BWF World Superseries Finals nomawi inchuhna neih a ni a, world number 2 Akane Yamaguchi lakah Sindhu a chak loh avangin silver medal zawkah a lungawi a ṭul.

Badminton season kharna final-ah Sindhu hian a khel chhe lo, mah se Japan nula nen darkar khat leh minute 31 an inkhelh hnuah 21-15, 12-21, 19-21 in a chak lo zawkah aṭang.

Kum 22 mi Sindhu chuan, "Ka tan chuan season duhawm tak a ni a, tournament hnuhnung ber chu ṭha takin ka khar bawk. Kumin ang bawkin season tharah ṭha taka khelh chhunzawm theih ka duhin ka beisei bawk," tiin a sawi.

Rio Olympic-ah khan Sindhu hi pahnihna a ni a, November thla a khelh zawh tak Hong Kong Open-ah khan uiawm takin final-ah a chak lo zawkah a ṭang tawh bawk; BWF World Superseries Finals-ah silver a dawng chhunzawm leh a, inelna lian pathumah champion zo lo mah se final a luh phak avangin season chhia tia sawi tur a ni lo ang.

Mipa singles final-ah world number 1 Viktor Axelsen chuan Malaysian shuttler Lee Chong Wei chu 19-21, 21-19, 21-15 in a hneh a, Denmark tlangval hian world number 1 ni chungin season a khar dawn a ni.