Juve chak niah Milan an tlawm

Pathianni zan Serie A inkhelah champion lai Juventus chuan khualmualah Bologna chu si thum faiin an hneh a, hmasawn tum AC Milan erawh Hellas Verona lakah 3-0 in an tlawm thung.

Turin club tan Miralem Pjanic-a'n free kick aṭanga goal hmahruai a khung hnuah striker Mario Mandzukic goal khung tur a siamsak bawk a, Blaise Matuidi chuan second half-ah mawi zetin a volley lut bawk. Juventus hian point 41 hmuin league table-ah pahnihna an ni a, hmahruaitu Napoli aiin point khatin an hniam zawk.

Juventus manager Massimiliano Allegri-a'n season tir lama cheṭha tak Paulo Dybala chu bench-ah a ṭhuttir a, hun tawp lam minute 15 chhung chiah khelmual chhungah luhtir a ni.

Italian manager Allegri chuan, "Player ṭha kan ngah a, hmun nghet chang tur chuan an thawhrim vek a ngai. Dybala pawh player ṭha tak a ni a, minute 90 khel tur chuan tuna aia a fit lehzual a pawimawh," tiin a sawi. Argentine international Dybala hian season kal laiah a club tan hian goal 13 a khung tawh.

Milan an te

Italian champion vawi 18 an ni tawh a, European Cup pawh ṭum sarih an chawi tawh. AC Milan hian player lakluh nan nipui bazarah khan pound maktaduai 210 an hmang a, tuna an dinhmun chu pariatna a ni - Napoli aiin point 18 zetin an hnufual tawh a ni.

Verona tan Antonio Caracciolo, Moise Kean leh Daniel Bessa ten goal khat ṭheuh an khung a, Milan tana thu lawmawm loh dang chu midfielder Suso chu hun tawp hma chiahin hnawhchhuah a ni.

AC Milan coach Gennaro Gattuso chuan, "A tir lam minute 25 chhung kan khel ṭha em em a, a hnu lamah erawh beisei kan phak lo. Kan goal chhuah pahnih kha chu ven theih a ni a, kan fimkhur tawk loh vang a ni. Hun harsa kan tawng mek a, paltlang turin huaisenna kan neih a ngai," tiin a sawi.