Player 10 Berlin lakah Leipzig an tlawm

RB Leipzig chu player 10-a khel Hertha Berlin lakah 3-2 a an tlawm avangin Bundesliga table-a a sang pali zingah an tel phak ta lo, point 28 neiin pangana dinhmun an luah mek.

Pathianni zan khan Red Bull Arena-ah Leipzig hian Hertha an mikhual a, RB striker hlui Selke chuan a club hlui a hmachhawnna hmasa berah minute ngana lekah goal hmahruai a khung a, an lawm chhung erawh a rei lo, minute khat hnuah Hertha defender Jordan Torunarigha chu Timo Werner an tihtluk avangin hnawhchhuah a ni.

Player tlem zawk Hertha lamin Chelsea striker hlui Salomon Kalou leh goal hmahruai khungtu Selke te hmangin goal an khung zui a, hun tawp lamah Leipzig tan Willi Orban leh Marcel Halstenberg ten khung ve leh mah se awmzia a nei tawh lo.