Jeje-a'n goal a khung leh ta

'The Mizo Sniper' tia hminglem an pek Jeje Lalpekhlua'n goal khung a chawlhsan thei lo - Pathianni tlai khan Chennaiyin FC chuan an mikhualna ramah Bengaluru FC chu 2-1 in an hneh a, Chennai club goal hmahruai hi Jeje-a khung a ni.

Sree Kanteerava Stadium, Bengaluru-a inkhelah Jeje-a'n goal khung turin hun a duh rei lo. Minute ngana leka buai nuai kara a goal shot chu India international goalkeeper Gurpreet Singh Sandhu-a'n a dang zo lo a, South Indian derby-ah Mizo an langsar nghal.

Goal dang a luh lawk loh avangin Chennaiyin hi an chak mai dawn niin a lang hman a, mah se minute 85-naa inlar Sunil Chhetri chuan BFC tan an si phurh a sut ṭhen. Chennaiyin-in rei tak hmahruai hnua tlawm an tum lo a, Dhanpal Ganesh chuan hun tawp nan minute hnih chiah a awm tawh tihah goal dang khung ve lehin Chennaiyin an chak.

Bengaluru tan Lalthuammawia Ralte-in match hnih goal a ven hnuah bench lamah a ṭhu a, hrem vanga inlan thei lo Gurpreet Singh Sandhu a lo kir leh tawh avangin Champhai tlangval tan starting XI-ah hmun a awm lo.

Chennaiyin tan Jeje bakah Jerry Lalrinzuala a inlan bawk a, champion tum ngam club-ah Mizo tlangval pahnihin hmun pawimawh an chan chhunzawm zel.

Pathianni zan ISL inkhel dangah Atletico de Kolkata chuan tun season chhunga a vawi khat nan chak hmel an hmu ve ta bawk a, an mikhualna ramah Mumbai City chu 1-0 in an hneh. ATK tan tlarhmaah Robbie Keane inlan mah se goal khungtu erawh Tottenham Hotspur striker hlui ni loin Robin Singh a ni thung.

Mimal Lawmman
Mumbai City 0 - 1 Atletico de Kolkata
Moment of the Match Robin Singh, ATK
Winning Pass of the Match Zequinha, ATK
Fittest Player Lucian Goian, Mumbai City
Emerging Player Debjit Majumder, ATK
Hero of the Match Zequinha, Mumbai City

Bengaluru FC 1 - 2 Chennaiyin FC
Moment of the Match Dhanpal Ganesh, Chennaiyin FC
Winning Pass of the Match Rene Mihelic, Chennaiyin FC
Fittest Player Sunil Chhetri, Bengaluru FC
Emerging Player Nishu Kumar, Bengaluru FC
Hero of the Match Mailson Alves, Chennaiyin FC