Inter Milan-in a nghetin Alexis Sanchez an duh

Manchester United-a beisei pha lo Alexis Sanchez-a'n Inter Milan tan hmun pawimawh a chhang chho a, Italian club-in Chile striker hi a ngheta lakluh an duh. 

Antonio Conte hote hian Thawhlehni zan khan Napoli 2-0 in an hneh a, Sanchez pawh minute 60 chhung a inlan. Inter hi kum 2011 hnuah a sang pathum zingah an tel tawh lo a, tun season-ah erawh match hnuhnung bera Atalanta an hneh a nih chuan pahnihna an ni ang.

Kum 31 mi Alexis Sanchez hi Lionel Messi leh Cristiano Ronaldo te huanga dah tur ni lo mah se Chilean star hian player ropui pahnih hi a hnaih ve ṭhin hle.

Sanchez hi an ram club Cobreloa aṭangin a inzir chhuak a, kum 17 a nihin Serie A club Udinese-in pound maktaduai 1.8-in an lalut. Amaherawhchu a kum a la naupan avangin intuai hriam turin Chilean club Colo-Colo leh Argentine club River Plate-ah te an kaltir.

Loan-a a khelhna hmunah Sanchez a hlawhtling a, Udinese tan September 14, 2008 khan a vawi khat nan Serie A-ah a inlan ṭan a, hma pawh a sawn chak hle. Udinese-ah Italian striker Antonio Di Natale nen inkawpin Serie A-a tlarhma hlauhawm ber zinga mi an ni a, 2011-a FIFA.com-in rawlthar ṭha poll-ah siamah phei chuan pakhatna niin Gareth Bale, Javier Pastore, Ganso leh Neymar ten an tluk lo.

Barcelona-in pound maktaduai 23-in an lalut a, Sanchez hian Catalan club tan hian season thum chhungin goal 10 a khung tling vek a; La Liga, Copa del Rey, UEFA Super Cup leh FIFA Club World Cup te vawi khat ṭheuh chawi mah se Barca-in Lionel Messi an kawl miau avangin hmun pawimawh a chang pha lo.

Sanchez hian Catalan club-ah beisei a pha lo chungin a theihna erawh hmuh hmaih a ni lo, kum 2014 khan Arsenal-in Chile striker hi pound maktaduai 35 bawr velin an lalut. A hun lai chuan manto tak a ni - Chelsea-in Atletico Madrid aṭanga Diego Costa an lakluhna pound maktaduai 32 aiin a tam zawk.

Arsenal-ah Sanchez a ropui a, FA Cup-ah vawi hnih an champion a ni satliah lo - team innghahna tak tak a ni. Gunners tana khelh lai hian Chile tan pawh a khel ṭha a, Lionel Messi telna Argentina chawi theih loh Copa America-ah vawi hnih an champion. 

Amaherawhchu Arsenal-in league nomawi an chawi thei lo a, Sanchez-a'n team ṭha zawk pan a duh. Manchester City leh Manchester United an rawn lang a, nomawi la thei tura ngaih team pahnihah hlawh pe tam ngam zawk Old Trafford a pan. United lamin London club hi Henrikh Mkhitaryan an pe ve thung.

Jose Mourinho-a'n tlarhma ti chak turin United-ah Sanchez a lalut a, Arsenal duhlai a ni bawk nen a tlangzarhna pawh an ti ropui hle. Khelmualah erawh Sanchez hian beisei a pha lo zui a, season hmasa berah league match 12 inlanin goal hnih a khung.

2018-19 season-ah erawh kumtir aṭangin a inlan a, United ṭantuten beiseina sang tak nei mah se league match 20 chauh inlanin goal khat chauh a khung. Sanchez hian kar khatah  £400,000 bawr vel a hlawha ngaih a ni a, a hlawh zat aṭanga teh chuan khawvel player ṭha ber ni mah se United nen an inkawp rem lo.

Mourinho thlaktu Ole Gunnar Solskjaer-a'n press conference-ah ṭan ṭhin mah se chhawr zui tlakah a ngai lo. Sanchez hi a hlawh a tam avangin club naran tana lak theih a ni lo a, Italian club lian Inter Milan pawhin a hlawh zat hi pek an harsat. 

Amaherawhchu Solskjaer-a'n player naupang zawk Mason Greenwood leh Marcus Rashford te a rin zawk avangin Romelu Lukaku kalna Inter-ah Sanchez hi loan hmangin an kaltir. Inter hian Sanchez-a hlawhah kar khatah £175,000 vel an peah a ngaih theih a, United lamin kar khatah nuai hnih aia tam an la pe tihna a ni. United-in Sanchez-a hlawh atana an sen zat hi Pierre-Emerick Aubameyang leh Mohamed Salah te hlawh a la tluk pha!

Alexis Sanchez hian kum 2022 thleng Old Trafford-ah contract a nei a, loan hmangin Inter Milan tan a khel mek. Tun season hi ruahmanna pangngaiah chuan tawp tawh tur a ni a, amaherawhchu Covid-19 vangin pawhsei a ni.

United-in Sanchez hi Serie A season hman zawh an phalsak a, Europa League-ah Inter Milan an la dam avangin Chilean forward hmalam a chiang lo. Thuthang awm danah United hian Europa League Last 16-a Getafe nena an inkhel tur bik chu an phalsak dawn a, hemi hnu lam erawh Man United-in nomawi an la beisei ve tho avangin a rem kher lo ang.

Chutihrualin Ole Gunnar Solskjaer-a'n season thara a ruahmanaah Alexis hi a telh lo a, chhuak turin a duh. United-in Sanchez hi an hralh theih nan Europa League-a khelh chhunzawm zel hi an phal a rinawm lo a, Inter-in an duh tak tak a nih chuan sum an thehchhuah a ṭul dawn.

Mahse Inter Milan-in Sanchez hi tuna a hlawh ang zat an pe thei dawn lo a, Arsenal forward hlui hian Italian club hi zawm a duh a nih chuan a hlawh a ti hniam a ṭul dawn. Hemi a nih avang hian Inter leh United an inrem thei a nih pawhin Sanchez-a kutah tlutlukna tawp a awm ang.