US Open khel lo tur Barty

Hmeichhe tennis world number 1 Ashleigh Barty chu US Open-ah a inlan dawn lo, inelna lian a khelh loh tur chhan hi Covid-19 boruak leng vel vanga buaina hmachhawn a duh loh vang a ni.

March thla aṭang khan tennis inelna an chawl lailawk, August 31 hian New York khawpuiah US Open hi a hmuna entu awm loin khelh tum a ni. Player inlan tur tan inkaihhruaina dan khirh leh hautak zawm a ngai dawn.

Kum 24 mi Barty chuan, "Covid-19 vangin buaina leh harsatna hrang hrang a thleng thei, hetiang dinhmuna ka team hruai luh hi ka duh lo," a ti. Australian nula hian United States Tennis Assocition chu duhsakna a hlan a, nakkumah chuan inlan theih ngei a beisei.

World number 2 Simona Halep, Naomi Osaka leh 2019 US Open champion Bianca Andreescu te pawhin an inlan dawn em tih an la sawi chiang thei lo. Player tam tak chuan hripui hluarna US pan hi an hreh deuh dawn niin a lang.

US Open bakah hian French Open chu September 27 aṭanga khelh ṭan a ni dawn. Roland-Garros champion Barty chuan, "Kar leh lamah ka ti chiang ang," tiin Paris khawpuiah a nomawi kawl lai humhim turin a kal ngei dawn tih pawh a la sawi chiang thei lo.