I League hmahruaitu Minerva Punjab

Thawhṭanni zan I League inkhelah Minerva Punjab chuan an mikhual Indian Arrows chu 1-0 in hneh a, I League table chung berah awmin hmahruaitu an ni. Punjab-a inkhela goal awmchhun khungtu hi Bhutanese striker Chencho Gyeltshen a ni a, minute 80-naa a goal khung hi Edmund Lalrindika hoa khel Indian Arrows-in an chhanglet thei lo.

Match li an khelh aṭanga tlawm hmel la hmu lo Minerva Punjab hian I League table chung ber an luahlum chhunzawm zel a, season hmasaa a tikimtu club kha tun season-ah chuan champion tum ngam club an ni ta - December 27-ah champion lai Aizawl FC hmachhawn turin Minerva hi an lo kal dawn a, Lajong laka chak lo hlim thinrim AFC an hmachhawn tur hi mipui hmuh chak a ni.