Siammawii kan chân ta

Mizo hockey player zinga India tana inlan thei hmasa ber C. Lalsiammawii chu nimin tlai khan Civil Hospital, Aizawlah lung na vangin a thi, kum 46 mi a ni. Keifang nu Siammawi hian India Junior Hockey team tan kum 1993 khan Colombo-ah test match a khel a ni.

Lalsiammawii hian infiam­na kawng hrang hrangah theih­na a nei sang hle a, Mizoram School Games-ah pawh Best Girl atan vawi thum thlan niin; National School Games leh North East Sports Festival-a fei khawhah (Juvenile throw) gold medal a la.

Volleyball lamah pawh a hun laia Mizoram team ṭha Power & Electricity Department team tan a khel. Football a thiam bawk a, National Women Football Championship 2000 leh Senior National Women Football Championship 2007, Orissa-ah a inlan a ni.

A sulhnu langsar te :

1. Kum 1990-1992 hi High School a kal lai a ni a, Mizoram School Games-ah Best Girl a ni vek.

2. National Women Hockey 1993, Chandigarh-ah a khel a, he ta ṭang hian National Camp-ah koh a ni. Indo-Sri Lanka Duel Meet Hockey Tournament 1993 Colombo-ah a kal, Mizo hmeichhe zinga Hockey vanga ram pawn dai hmasa ber a ni.

3. Kum 1993 National School Games-ah kalin thleng thlawh (Juvenile throw)-ah gold medal a la, kum 1993-1999 chhung khan kum tin National School Games-ah medal a la ziah.