Messi-a'n Argentina a champion pui thei ang - Riquelme
FIFA World Cup 2018 khel turin Argentina an tling hram a, hetichung hian Juan Roman Riquelme chuan an ramin Lionel Messi hoa nomawi an chawi theih a beisei.
Argentina international hlui Riquelme chuan, "Kan chet ṭhat ka beisei a, player zawng zawng dam
ṭha se ka duh a, a bik takin Messi hi dam ṭha se ka ti. Messi hi a dam ṭha a nih phawt chuan Argentina hian nomawi chawi thei turin beisei an nei dawn a, ani a awm hi chu thil theih loh a awm lo," tiin Barcelona star Messi chunga an innghah thu a sawi.
Kumin chhunga mimal chawimawna ngaihhlut ber Ballon d'Or erawh Messi ni loin Cristiano Ronaldo-a'n a dawng thung a, player pahnih hian vawi nga ve ve he chawimawina hi an dawng tawh a ni. Riquelme chuan, "Ronaldo hian Messi awm hi a ṭhat pui a, chutiang bawkin Messi pawhin Ronaldo awm hi a ṭhat pui a ni. Argentina-in Messi kan neih hi kan vanneih pui a, ka ngaihdanah chuan khawvela player ṭha ber a ni," tiin a sawi.
FIFA World Cup-ah Argentina hi Group D-ah Iceland, Croatia leh Nigeria te nen an awm ho a, an player neih dan aṭanga chhutin knockout stage luh harsa niin lang lo mah se Europe ram pahnih Iceland leh Croatia te an awm avangin chetsual theihna tur a ni.