Kei ka ni inti ve ngat thawhpui a awlsam lo - Chhinga Veng coach
Chhinga Veng FC-in Mizoram Football Association hnuaia season khat chhunga nomawi chawi theih zawng zawng Mizoram Premier League, I Day Football leh MFA Super Cup an chawi vek a, an record hi a chhuanawm hle.
Chhingcows treble champion puitu coach Lalsangzuala Hmar chuan, "Pathianin coaching hna hautak tak thawk thei turin hriselna leh hun ṭha min pe hi ka lawm hle a ni," tiin hriselna petu hnenah lawmthu a sawi.
Team an din
Chhinga Vengin 2016–17 season aṭangin MPL an khel ṭan a, Mizoram football inelna sang ber an khelh aṭangin a tikimtu nih tum loin champion an tum nghal. Season khatnaah hian sum seng nasa zingah an telpha a, player langsar pawh hui khawm mah se nomawi an chawi loh bakah MPL-ah pawh semifinal an thleng pha lo.
Amaherawhchu tun season-a an chet ṭhatna hi season liam ta aṭanga inṭan tawh kha a ni. MPL5 tawp lamah Chhinga Veng hian champion tum tawh loin him (relegate loh) chiah an tum tawh a, season thar atan coach leh player an zawng ṭan nghal a, a hun lai chuan thutlukna atthlak a ni. Chhingcows hian semifinal an luh theih reng laiin khelmual chhung aiin khelmual pawn hlimna an ngaihtuah zawk a, Chanmari West hneha semifinal thleng thei tur an nih laiin 2-0 in an chak lo.
Chhingcows hruaituten hma la
ṭan nghalin Chanmari FC champion puitu coach Lalsangzuala Hmar an hmin hnuah player pawimawh R. Malsawmtluanga, Malsawmfela, Lalrichhana Tochhawng, Lalrinchhana leh Ramfangzauva te an la chhuak. MPL5-a an chak lohna goalkeeper-ah an duh tak Zothanmawia an hmin nghal a, College Veng tlangval hi Aizawl FC aṭanga an sawm luh a ni.
BVT top scorer Lalrammuanpuia, innghahna Laldingngheta leh defender hmabak nei ṭha R. Laldinliana leh Hmingthanmawia te lalutin vawi leh khatah Chhingcows hu MPL final khel tawh ṭhiau an ni a. An ṭha tawk viau tawh e, tih theih hnuah MPL5 semifinal an khelh lohna chhan, an lama goal hnih khungtu leh MPL5 top scorer Laldampuia an lalut a, an kawl sa zingah MPL top scorer leh best forward ni tawh MS Dawngliana leh Lalkhawpuimawia te an awm bawk.
Ro an rel
Chhinga Veng hi an hmaa nomawi hmasa ber MFA Super Cup-ah an champion nghal a, nomawi chawi tur hian Zarkawt FC, Zo Dreams FC, Chawnpui FC, Bethlehem Vengthlang FC, Venghlui FC leh Chanmari West te an hneh a, match ruk an khelhah goal 46 khungin goal li chiah an chhuah.
I Day Football-ah MPL club bakah state pawn aṭanga chahluh club te chauh an khel chungin khingpuite hneh vekin nomawi an chawi nawn. Champion tur hian Chanmari FC vawi hnih an hneh bakah Chanmari West FC, Mizoram Police, Rhino Charge leh Bethlehem Vengthlang FC te an hneh bawk. Chhingcows hian match ruk an khelhah goal 25 an khung a, goal sarih an chhuah.
MPL-ah Aizawl FC nen an inhnehtawk avangin match 14 an chak zawn tawh hnuah an record duhawm tak chu tihtawpin a awm a, H. Vanlalthlanga hoa Chanmari record an pha ta lo. Amaherawhchu match 22 chhung hneh lo nei loa kal chhoin record thar an siam ta tho a, I League club AFC-in match 23-ah an hneh leh a, an record an tihtawp sak.
Chhinga Veng hian MPL6 final-a ṭum hnih an record tihtawp saktu Aizawl FC lakah phuba an la a, Mizoram inelnaa hlu ber Mizoram Premier League-ah an champion a, an nomawi chawi dan pawh duhthusam a ni.
A awlsam lo
Chhinga Veng coach Sanga chuan, "Mizo player ṭha kan tih, mahnia 'Kei' inti ve ngat ka thawhpui nual a, thil awlsam tak a ni lo. Mahse discipline khawng tak hnuaiah thuawihna leh tih tak takna nen season tawp kan thleng thei a, Pathian malsawmna dawngin trophy pathum nen season kan han khar thei hi a ropui a, ka lawm hle ni," tiin Vanglaini a hrilh.
Chhingcows boss chuan sawi chhunzawmin, "He kan hlawhtlinna atana mi pawimawh CVFC a ka thawhpui coaching staff, player-te, club hruaitute leh kan supporter zawng zawng hnenah lawmthu ka sawi a, kan vai thawhrah a ni," a ti.
Thlanga a hre reng
Sanga hian hlawhtlinna a chan hian amah zirtirtu leh chher hriamtu coach H. Vanlalthlanga a hre reng a, lawmthu sawiin, "Chanmari FC coach Sir Thlanga chungah thinlung takin ka lawm a ni. Vawiina hetiang dinhmun ka thlen theihna tura min chher chhuaktu leh midang ngai chang ṭhin (democratic) coach aṭanga mahni thutlukna siam ngam (authoritarian) coach a min her danglamtu a ni bawk a, a chungah hian lawmthu ka sawi mawlh mawlh a ni," a ti.
Chhinga Veng champion puitu coach Sanga hian kumin khan Santosh Trophy-ah Mizoram chu semifinal a thlen pui a, nakkumah pawh Mizoram team a enkawl leh ang. MPL an champion theih nan Sanga hian a player-te season tluanin inkhel tlakin a dah thei a, semifinal leh final-a top scorer beisei la nei Malsawmfela substitute-a a dah ngam te leh R. Malsawmtluanga'n a vanglai hun a hman ṭhat leh danah hian coach hian fak a phu hle a ni.