Parker hmachhawn inbeisei Joshua

WBA leh IBF world heavyweight champion Anthony Joshua chuan WBO title kalwtu Joseph Parker chu nakkum March emaw April-ah an kawnghren kawl lai ve ve dahkham chunga hmachhawn a inbeisei thu a sawi chhuak.

British boxer Joshua aiawh te leh Parker-a aiawhte hi boxer pahnih inhmachhawn tur chungchanga sum insem dan turah an indawr mek a, New Zealand fighter Parker-a hian a hlawkna aṭanga 35% chan a beisei thu a lo sawi tawh.

Joshua chuan, "Joseph Parker hi a thil duhah a chiang a, inbiaknaah pawh an thil tum chiang takin an sawi. Ka ngaihdan chuan kan pahnih hian March emaw April-ah kan inhmachhawn theih ka ring," a ti.

Boxer pahnih hi an inhmachhawn a nih chuan boxing khawvela belt dahsan pali zinga pathum WBA, IBF leh WBO kawnghren an kawl thei dawn tihna a ni a, he inhneka chak zawk tan kawnghren awm zawng zawng kawl vek turin WBC champion Deontay Wilder an hmachhawn leh a ṭul ang.

Belt hriat hlawh ni lem lo IBO kawnghren pawh kawltu Joshua chuan, "Championship belt dang pawh kan beisei zel ang. Championship belt panga a awm a, chung zinga pathum chu ka kutah a awm. A hlimawmna chu a dang pahnih pawh ka hmaah a inchhawp hi a ni," tiin kawnghren kawl kim vek a tum hle.