Man Utd leh Chelsea inlan zan

Carabao Cup-ah zanin hian champion lai Manchester United an inlan dawn a, Jose Mourinho hote hi tie draw-ah an vanneih avangin Championship club Bristol City FC nen pawhfuh an ni a, semifinal an thlen ngei beisei a ni. Zanin dar 1:15 hian Chelsea-in Stamford Bridge-ah Bournemouth an mikhual dawn bawk a, Blues tan Premier League club Cherries khelh a awlsam lo ang.

Inhliam an tam

Manchester United-in West Brom an hneh ṭumin Antonio Valencia a inhliam a, Eric Bailly lah a nghalrek liam an zai dawn avangin hun rei zawk a la chawl dawn. Midfielder Michael Carrick leh Marouane Fellaini te chu nakkum lama inlan tur chauh an ni bawk. An khingpui tur Bristol lamin inhliam an ngah zawk a, Championship lam hian inliam vangin pariat ngawt an chhawr thei dawn lo.

United tana thu lawmawm erawh Paul Pogba hremna a zo a, French midfielder hian khelhna hmun chang tam lo player dang a rawn ho beisei a ni. English wing back Luke Shaw-a'n tun hnaia vawi hnih a rawn inlanah a khel ṭha ve ve a, midfielder beiseiawm Scott McTominay bakah veteran striker Zlatan Ibrahimovic thlengin an inlan a beiseiawm.

Robins (Bristol hming lem) khelmual Ashton Gate-ah hian mipui 27,000 an leng a, an mikhual tan ticket 2,641 chiah an zuah sak a, chu chu 10% bawr vel a ni. An khingpui tur United an nih miau avangin ticket an hralh zo vek a, awlsam takin mikhual hi chak tir an tum lo ang.

Bristol hi season liam ta khan Championship-ah 17-na an ni a, hetichung hian manager Lee Johnson chungah rinna an nghat chhunzawm a, mi tam tak chuan relegate tur ang hialin ring mah se tunah hian table-ah pathumna an awm mek a, season thara Premier League khel thei turin beisei an la nei sang hle. Robins hian inelna hrang hrang match hnuhnung 10-ah vawi riat an chak a, United tan pal zam mai chi an ni lo ang.

Chelsea lam hi

Chelsea boss Antonio Conte chuan, "Khelhna hmun nei tlem zawng tan hun hawn sak leh ka duh a, chutihrualin semifinal thlen ngei pawh kan duh," tiiin Bournemouth nena quarterfinal an khelh tur chungchang a sawi.

Blues hian quarterfinal thleng tur hian Everton 2-1 n an hneh hram a, hemi ṭum pawh hian player naupang zawk kum 17 mi Ethan Ampadu, Kenedy leh Charly Musonda te chhawr a, khelhna hmun chang tam lo keeper Willy Caballero, wing back Davide Zappacosta, midfielder Danny Drinkwater leh forward Michy Batshuayi te a chhawr. Zanin hian an player pawimawh Marcos Alonso chuan yellow card pangana a hmuh avangin a inlan thei dawn lo a, Italian manager tan erawh Premier League inkhelh hmabak thlirin chanchin lawmawm a ni thei ang.

London club khingpui tur Bournemouth hian hun harsa an hmachhawn mek a, league match hnuhnung parukah chak an neih loh avangin relegation zone aṭanga an himna chu point khat chauh a ni. Eddie Howe tan League Cup aiin Premier League khelh zel a hlu dawn a, hei vang hian player ṭha ṭhenkhat a awltir a ṭul dawn.

Cherries hian Liverpool 4-0 in an hneh lo zo chiah a, Chelsea an hmachhawn zawh hian league-a vawi 16 chak zawn tawh Manchester City an hmachhawn lehnghal dawn a, an hmabak a hau tak hle. Hei vang hian mahni muala khel tur Chelsea tan semifinal kawng a inhawng zauah a ngaih theih a ni.