Big Sam hnuaiah Everton an insiamthar
Premier League table mawng lama talbuai Everton-in team enkawl turin Sam Allardyce an lalut a, English manager Big Sam kaihhruaina hnuaiah invawrh sang zelin pakuana an ni leh der tawh. Thawhṭanni zan inkhelah Everton hian an mikhual Swansea City chu 3-1 in an hneh a, point 25 an hmu ve ta.
Goodison Park-a inkhelah mikhual lamin Leroy Fer hmangin goal hmahruai a khung a, chawlhlawk hma chiahin Toffees tan Dominic Calvert-Lewin chuan an si phurh a sut, Wayne Rooney-a penalty pet rawn per let chu Lewin hian goal-ah a chantir.
Everton player manto ber Gylfi Sigurdsson-a'n a club hlui lakah minute 64-naah hla deuh tak aṭangin goal mawi a khung a, England captain hlui Rooney-a'n penalty aṭangin an goal thumna a khung zui bawk. Everton-in hma lam an pan zel laiin Swansea erawh a mawngphah mawitu an la nih chhunzawm zel.
Fapa duhawm Rooney
Manchester United aṭangin a club hluiah a kir a, match hmasa lamah beisei phak lo mah se tun hnaiah Rooney chu thlamuanpui thamin a khel chhuak. Swans lakah goal a khung bakah assist a nei leh a, hun tawp hma chiaha lakchhuah a nih laiin amah zah lantir lan fans an ding ṭhup mai a ni.
Kum 32 mi Rooney hian tun hnaiah a khel ṭha tluang hle, Everton tana a league match hnuhnung pakuaah goal riat a khung bakah a ṭhiante khung tur vawi hnih a siamsak bawk a, tlak hlauhawm dinhmuna ding hman kha table chung lamah a hruai chho mek.
Rooney chuan, "Goal kan phurh hmasak hnuah pawh hnehna kan chang let thei a ni tih hre reng chungin kan bei let thei, kar li liam ta kha chuan tuna kan rilru ang hi kan nei phak lo a ni. Manager paukhauh takin min kaihhruai hnuah boruak a inthlak a, krismas kan hman hnuah pawh hnehna kan chan chhunzawm theih ka beisei," tiin a sawi.
Premier League bikah Rooney hian a ṭhiante goal khung tur vawi 105 a siamsak tawh a, a chungah hian Cesc Fabregas (111) leh Ryan Giggs (131) te chiah an awm tawh a ni.
Everton manager Sam Allardyce chuan, "Player tinin an theihna tak an lantir ka duh a, chumi tur chuan theihtawp ka chhuah bawk. Tun hnaia hma kan sawn chhan hi keimah ni loin player te an ni zawk. Table hnuai lama an zawn ṭhin kha tunah chuan a vantlang chunglamah kan awm leh ta a, he boruak ṭha hi vawn nun zel pawh kan tum ang," tiin a sawi.
Toffees hian Inrinni zanah Premier League champion Chelsea an hmachhawn zui leh nghal dawn a, Big Sam chuan Blues lakah result ṭha neih a duh thu a sawi a, inrintawkna an neih phawt chuan point an hmuh ngei a beisei thu a sawi bawk.
Swans an vanduai
Table mawngphaha awm mek Swansea lamin striker Wilfried Bony chu minute lina lekah hliam vangin an chan a, Manchester City laka mualpho hlim an ni nachungin Everton lakah bul an ṭan ṭha viau.
Luciano Narsingh leh Tom Carroll te hunṭha chu Everton goalkeeper Jordan Pickford-a'n a dansak a, goal an neih hnuah ṭum hnih ngawt penalty an chawi bawk–an vanneih ṭum chu nise an goal neihchhun hi humhim thei tur an ni.
Swansea manager Clement chuan, "Hun chanve hmalam kha chuan kan khelṭha takzet a, penalty kan chawi hlauh kha a pawi hle. Ball kang kan hmang nasa a, kan hlawhtling bawk. Chutihrualin kan tlarhnung a nghing a, kan invenṭhat tawk loh vangin goal kan chhuah. Everton lakah hian zirlai ṭha tak kan zir chhuah ngei ka beisei a ni," tiin a sawi.