Clasico khel turin Rafinha a dam tawh

Barcelona midfielder Rafinha chu khup hliam vanga thla riat ngawt a hmel a inlan tawh loh hnuah Inrinni zan El Clasico khel turin a dam leh tawh tih Catalan club chuan an puang.

Kum 24 mi midfielder hian April-a Granada nen an inkhelh ṭumin a malpuiah hliam a tuar a, kum 2017 chhungin vawi hnih zai a tawk tawh. Tun thla tir khan ziaawm lam pan ṭanin club training a zawm a, Barca chuan inkhel tura a in fit tawh thu an puang ta a ni.

Rafinha hian Real Madrid lakah inkhel bul a ṭan nghal beiseiawm loh mah se Barca player zingah inhliam an awm nual avangin coach Ernesto Valverde-a'n bench-ah tal chuan chhawr tura a dah a rinawm.

Barca hian striker Paco Alcacer chu Pathianni zana Deportivo La Coruna laka 4-0 a hnehna an chan ṭuma a inhliam avangin an chhawr thei dawn lo a, Ousmane Dembele-a'n training nei ṭan ve leh tawh mah se inkhel tur khawpin a la in fit tawk lo bawk.

Club captain Andres Iniesta chuan a chawnah hliam a tawrh hnuin ngai a awh leh ṭan tawh thung a, Spanish midfielder hian Deportivo an hmachhawn ṭum khan minute 56 chhung khelmualah hun a hmang a ni.