Highlanders khelmualah Mumbai City

Zaninah Indian Super League inkhel pakhat a awm dawn a, zan dar 8:00 hian NorthEast United chuan Mumbai City an mikhual dawn. Club pahnih hi an match hnuhnung bera hnehna chang zo lo ve ve an ni a, zaninah hnehna chan ngei an duh tawh ang.

Highlanders-in an match hnuhnung bera Kerala Blasters 1-0 a an hneh loh ṭumin goalkeeper Rehenesh TP chu hnawhchhuah a ni a, kum 24 mi goalkeeper hian zaninah Mumbai City a hmachhawn ve thei dawn lo.

Mumbai lakah Mizo tlangval pathum Robert Lalthlamuana, Lalrindika Ralte leh Lalrempuia Fanai te chu bench-ah hun hman tluantir vek an ni a, Highlanders coach Joao Carlos Pires de Deus-a'n zaninah Mizo pathum bench-ah a dah vek a rinawm tawh loh.

NorthEast United coach Joao Deus-a'n Mumbai laka an tlawm ṭumin, "Ka player-te hnenah chiang taka ka sawi tawh chu hnehna kan chan vang maiin engkim hi a kal dik ta tihna a ni lo a, chutiang bawkin kan tlawm hian thil zawng zawng a kalsual ta tihna a ni chuang lo. Tun dinhmunah goal hmaah kan la vannei tawk lo a ni mai thei a, mah se goal tam tak kan khung hun chu a la thleng ang tih ka chiang a ni," tiin a naute a rinhlelh loh thu a sawi a, Mumbai lakah hnehna chan a in beisei ang.