Bayern kan hlau lo – Julian Weigl

Borussia Dortmund midfielder Julian Weigl chuan an chunga awm mek Bayern Munich an hlauh loh thu a sawi. German club ropui pahnihte hi zanin dar 1:15 hian Allianz Arene-ah an intawng dawn a, a chak zawkin German Cup fourth round an lut ang.

Dortmund hian an manager thar Peter Stoger kaihhruaina hnuaiah match hnih khel tawhin an chak ve ve a, inrintawkna an nei let leh tawh. Kartawpa an match hnuhnung berah hun tawp dawna Christian Pulisic goal khung hmangin Hoffenheim chu 2-1 in an hneh a ni.

Kum 22 mi Julian Weigl chuan, "Tun hnai kar hnih chhung kan thawkrim em em a, hma pawh kan sawn hle. Kan khingpui tur Bayern hi team ṭha tak an nih avangin chetsual a thiang dawn lo, chutihrualin keini lam pawhin hnehna chang tur chuan vanneihna kan mamawh ve bawk ang," tiin a sawi.

Bayern Munich hian League Cup hi vawi 18 zet chawi tawhin record nei ṭha ber an ni a, Dortmund nen hian final-ah Dortmund hi vawi thum an hneh tawh. Kuminah erawh final hmain an intawng dawn a, tlawm zawk nih an duh lo khawp ang.

German champion Bayern Munich hian league lamah chuan point 11 zetin hma an hruai fal tawh a, zaninah hian Thomas Muller chuan inkhel bul a ṭan thei tawh tura ngaih a ni. Muller hi kartawp khan bench-ah dah a ni a, khelmual a luh hnua lawkah chakna goal a khung.

Muller bakah hian Robert Lewandowski leh David Alaba te an dam ṭha a, Franck Ribery leh Arjen Robben te pawh an dam tawh avangin tlarhma lamah duhthlan tur an ngah.