Griffin Park thlah nan Brentford an chak Brentford-in Playoff Final an khel dawn

Premier League khel tur zawnna Championship playoff semifinal-ah Brentford-in first leg-a an hneh loh Swansea chu Nilaini zan khan 3-1 in an hneh a, aggregate-ah 3-2 in an lehthal. Championship-a pathumna dinhmun luahtu Brentford hian Griffin Park-a an match hnuhnung berah hnehna an chang a, season thara stadium thar an hman hunah Premier League khel thei dinhmunah an ding.

Nizan khan semifinal second leg-ah Fulham leh Cardiff City te an inkhel a, first leg-ah Fulham 2-0 a an chak tawh avangin Scott Parker hote hi Wembley thleng turin an dinhmun a ṭha hle. Fulham hi an chak thei a nih chuan Brentford nen Premier League khel tur an zawng ang.

Brentford-in Championship match hnuhnung lamah a zawnin match riat an chak a, Premier League khel thei dinhmunah an ding. Amaherawhchu match hnuhnung pahnihah Stoke City 1-0 in khualmualah an hneh lo a, an mual Griffin Park-ah Barnsley 2-1 a an hneh loh zui avangin pathumna niin season an khar.

Premier League khel turin Brentford-in playoff an paltlang a ngai a, Liberty Stadium-ah an chesual. Minute 65-naah Brentford defender Rico Henry hnawhchhuah a ni a, Swansea tan Andre Ayew-a'n minute 81-naah chakna goal a khung. Inkhelh zawh hnuah Rico Henry-a red card hmuh dan hi ennawn a ni a, sutsak a nih avangin Brentford defender hi second leg khelh phalsak a ni.

Griffin Park-ah Swansea an rawn lut hmasa a, entu awm lo mah se stadium announcer chuan au thum deuh takin Brentford player-te rawn chhuah tur thu a puang. Stadium pawn lamah Brentford ṭantu tlema zawng an pungkhawm bawk a, mikhual team aiin inkhel boruakah an cheng hmasa zawk.

Minute 11 lekah keeper David Raya aṭanga ball pek chu Mathias Jensen-a'n lei hrulin ding lam aṭangin hmun hlauhawm laiah a chhunglut nghal a, Ollie Watkins-a'n Brentford goal hmahruai khung nan a hmang. 

Brentford an phur chho a, minute 15-naah Said Benrahma cross chu Emiliano Marcondes-a'n a tauh goal. Inkhelh ṭan hmaa dinhmun chhe zawk Bees (Brentford hming lem) kha minute 15 hnuah dinhmun ṭha zawk an ni tawh.

Brentford forward Benrahma a hmuhnawm chhunzawm a, Swansea player-te a bum hnuah goal ban a pet per. Swans pawhin Conor Gallagher hmangin siphurh an sut ṭhen teuh hle. Amaherawhchu second half ṭan chiahah vei lam ṭanga Rico Henry cross chu Bryan Mbeumo-a'n kawh zetin a volley lut.

Minute 78-naah defender tihsual vangin Swansea tan Rhian Brewster-a'n defender tihsual remchangah lain keeper Raya cool zetin a pet khum a, Liverpool aṭanga loan hmanga Swans zawmtu Brewster-a goal-in mikhual tan beiseina siam mah se goal dang a luh belh tawh lo.

Swansea head coach Steve Cooper chuan, "Tihtur kan insiam tam lutuk a, first half-ah kan khel ṭha lo. Hun tawp lamah insiamṭha tawh mah ila kan tihsual kan tuar. An goal hmasa ber kha counter attack a ni a, goal hnuhnung pahnih pawh ṭha mah se an veng ṭha lo," tiin an khelh fuh loh thu a sawi.

Brentford head coach Thomas Frank chuan, "Kan infuihna ber chu final kan thleng lo a nih chuan khelmual kan chhuahsan tur a ni lo tih a ni. Bul ṭan ṭhat a pawimawh angin kan khel ṭha nghal a, 3-0 a nih kha chuan final kan thlengah ka ngai. Amaherawhchu kan tihsual vangin goal kan chhuah a, kan hlauthawn phah hle," tiin a sawi.