Football leh a ropuina zawng zawng neitu Lionel Messi

“Lionel Messi hi football pet tawh zinga a ropui ber a ni," tih hnial thlak tum ṭalh chu thil harsa tak a ni tawh ang, tiin BBC chief football writer Phil McNulty chuan a ziak. Argentina captain hi player zinga ropui berah a pawm - a ngaihdan ṭawmpuitu an tam khawp ang.

Argentina chuan Qatar World Cup nomawi an chawi a, an lawmna thangri chuan khawvel a nghawr vel, hmun tin aṭangin fakna awka a chhuak, a tawi zawnga sawi dawn chuan, Messi ṭan lo tu nih tlat chu a hrehawm ngawt ang - lawmpui mai kha a hah dam thlak ngeiin a rinawm.

Ram tan a nih tawh chuan a boruak a danglam, theihna zawng zawng bakah 'tlem' hi an hlan tel ṭhin. Messi-a'n goal a khung zawha a lawm dan khan a ti fiah a, a nemnghettu chu Angel di Maria bianga lawmna mittui rawn luang chhuak kha a ni.

Ropuina chu...
Lionel Messi hian football a khelh hun chhungin nomawi tam tak a chawi tawh a, mimal chawimawina sang ber khawl hnem bertu a ni bawk. Mahse, famkim lohna a nei ve ṭhin a, chu chu an ram Argentina a hlawhtlinpui tawk lo tih a ni ṭhin.

Copa America final vawi thumah a chak lo zawk a ni a, 2014 World Cup final-ah a chak lo zawk an ni bawk. Messi ṭan lo tute tan chuan hengte hi inhnialna atana ṭan chhan ṭha ber berte an ni, an titi tui ber pawh a ni ṭhin reng a ni.

Ballon d'Or vawi sarih dawng tawhtu hian Champions League nomawi vawi li a chawi a, La Liga nomawi a chawi zat phei chu 10 teh meuh a ni, amaherawhchu a duhthusam thleng dik tur chuan a ngah rei a ngai ve ngat ngat hle.

Nikum khan Copa America nomawi an chawi a, hei hian a famkim lohna sawi ṭhin tute thawm ring tak a ti reh deuh a, mahse ropui ber nih inchuhna khawvel a nih miau avangin Copa America pawh hi a la tawk zo chuang lo.

Kum 35 mi a ni tawh a, a vanglai pelin atan chuan World Cup hnuhnung ber tura ngaih a ni. France nen final an khelh hma khan, atana World Cup match hnuhung a nih tawh tur thu a sawi lawk a nih kha.

Tunah chuan maw, engkim mai hi Messi duhthusam ang vekin a thleng ta. World Cup title a lak hnuah Messi chuan, "Duhthusam a thleng dik ta," tiin a sawi a, atan chuan football khawvelah hian hlen chhuah leh tur dang a awm tawh chuang lo - a nei vek miau a lawm!

Mi bik chu...
Vanglai a inrual lo a, inkhel kan en hun leh ngaihsan zawng pawh a inang lo. World Cup vawi thum champion Pele hi 'King of Football' tiin a hming lem vuahsak a ni a, hei hi khawvelin a pawmpui.

Diego Maradona a awm leh, ani hian 'chona tak tak' a hmachhawn a, a hlen chhuak bawk. Team tenau Napoli a champion pui avangin Italy mi tam takin Argentina nen an inkhelh ṭum pawhin Maradona an ṭan zawk!

Club tan chauh a ni lo, an ram Argentina tana World Cup 1986 a lak avang khan an ram mipui thinlungah a tla na, ani aia player ropui hi Argentine mi bakah a vanglai en phak tan chuan an awm tawh chuang lo.

Pele leh Maradona ropuina hi sawi nep chi a ni lo. Mahse, Messi an tehna ang hian teh ve dawn ta ni ila - Pele hian European football huangah nomawi a chawi miah lo a, Maradona pawh Copa America champion lo a ni ve bawk, an famkim bik lo tih a lang.

Player ropui chungchuang bik pahnihten an tih theih loh hi Messi chuan a ti thei vek a, an inkhelh hun a inrual miau loh avangin khaikhin vek erawh an remchang lo ang, mahse mi bikten an tih theih loh ti theitu chu Lionel Messi hi a ni.

Messi hi 'Greatest of All Time' tia puanna hun an siam kher lo ang, mahse football tui chilh leh hre ril, atchilh chung pawha rilru fim tak nei tlat si te chuan khawvela player ropui ber atan an pawm kumkhua tawh ang, hnial thlak chu harsa ve khawp ang.

A champion
Qatar World Cup-ah Messi hoin Argentina an champion a ni satliah lo, a tir aṭanga a tawp thlengin Messi hi team khaidingtu a ni a, match zawng zawng a khel mai ni loin minute zawng zawng a khel kim vek - an thlak ve miah lo tihna a ni.

Group state aṭangin goal a khung ṭan a, last 16, quarterfinal, semifinal leh final thlengin goal a khung vek. Mi tam takin football an khel a, inelna ngaihhlut World Cup khel pawh tam tak an ni a, chung zingah chuan Messi chauh hian tournament vawi khata round tinah goal a khung thei.

Kum 1982 World Cup aṭangin Golden Ball Award sem ṭan a ni a, tun thlengin Messi chauh hi World Cup player ṭha ber atana vawi hnih thlan theih a la ni, kum 2014 khan champion lo mah se he chawimawina hi a lo dawng tawh bawk.

Argentina tan World Cup goal 21 zetah a inrawlh, goal 13 a khung bakah assist vawi riat a nei bawk. Qatar rama inelna neih bikah a ṭhiante khung tur vawi thum a siamsak, goal khung chauh ni loin a semtu pawimawh a ni tel.

Final match bikah pawh ball semtu a ni a, penalty khung turin a 'cool' hle tih kan hmu. Counter attack aṭanga goal hnihna an khung dawnin awlsam hmel deuh a lang, mahse player nazawngin an thiam loh leh a nachang an hriat loh angin ball a pe chhuak thei tlat.

Extra time khelh laiin goal a khung zui a, stadium chhung boruak chauh a ni lo - Mizoram thlengin boruak chu pui mep mep tak a ni. Amah chauhina a duhthusam ni lo, khawvel football ngainatute duhthusam a thlen tir avangin Messi chungah football fans an lawm.

Thawnthu a la tawp lo
Lionel Messi chuan World Cup champion nih mai a la duhtawk lo a, hlawhtlinna ropui tak a chanpui Argentina jersey ha chung ngeia football khelh chhunzawm leh theih a duh thu a sawi.

Paris St-Germain forward Messi chuan, "Football hi ka hmangaih a, chu chu ka nun pui. Kan ram team hi nuam ka tiin ka hlim takzet a, theih ni se chuan world champion ni chunga match dang khelh leh ka duh.
"Argentina tana khelh leh hlawhtlinna chan hi ka thil chak leh duhthusam ber a ni ṭhin, tunah chuan hei aia nasa hi dil leh tur ka nei tawh chuang lo," tiin a sawi a, an ram tana a hun hmanah a lungawi hle.

Messi hian Qatar World Cup-ah goal sarih a khung a, player ṭha ber chawimawina 'Golden Ball' a dawng. Tunah kum 35 mi a ni a; United States, Canada leh Mexico ten World Cup 2026 an thlen meuh chuan kum 39 a ni tawh ang.

Argentina coach Lionel Scaloni chuan, "A hmasa berah chuan World Cup 2026-ah Lionel Messi tan hmun kan siamsak ang, kan zinga a la tel duh a nih chuan harsatna a awm lo ang. Argentina tan a la khel duh emaw, thil dang vang pawh ni se atan hmun a awm.

"Team leh a ṭhian dangte tana a thil thil hi sawifiah mai theih loh a ni hial, ka tan pawh ani enkawltu nih hi a lawmawm a, a hlutna chu nitina a khelhpui a ṭhiante hi an ni bawk," tiin an ram captain chu la chawl lo turin a duh hle.