Danglamna Emiliano Martinez

World Cup final khelh hma khan Lionel Messi leh Kylian Mbappe te hming a ri ring fal em em a, inkhelh lai pawhin anni pahnih aia thawm ring an awm lo, match a zawh meuh chuan 'Emiliano Martinez' hming lam tel a ngai.

Argentina keeper Martinez hian extra time tawp dawnah Kolo Muani nen chauh an inhmachhawn a, Muani hian chiang zetin a khung dawn nia a lan laiin a lo dansak hmiah, khung ni ngat se Argentina tan thawh chhuahna hun a awm tawh lo ang.

Penalty an pet zui ta ngei a, a hmasa berah Martinez hian Mbappe-a pet a zuan dik nghal, mahse ball kal a nat em avangin a dang zo lo. Mbappe dawta pet tur tan chuan boruak a siam nghal a, huphurhawm ve tak tur a ni.

Aston Villa keeper hian Kingsley Coman-a pet a zuan dik leh chat a, a lo dansak. Real Madrid midfielder Aurelien Tchouameni kha chuan Martinez hmachhawn kha a chak tawh lo, goal zawnah a pet ta lo.

World Cup hmasa kha chuan Martinez hian an ram inkhel kha a hmunah a en, fans tam tak zinga mi a ni. Tunah erawh goalkeeper ṭha ber chawimawina Golden Glove a dawng ta si, a thawnthu hi a ngaihnawm asin.

Copa America an champion dawn khan Colombia lakah penalty a dang chat chat tawh, tun ṭuma final an thlen theih nan Netherlands lakah penalty hmasa pahnih a dang bawk a, a hunah tak France a dangchat leh hmiah bawk.

A hringnun hi awlsam tak erawh a ni bik lo. Arsenal-ah khan kum riat chhung khel phak loin a awm, hetih chhung hian vawi ruk ngawt loan hmangin a chhuak, chumi hnuah inkhelh tam duh vangin Villa a zawm - a hnu lam chu kan hre tlang ta vek.