A hmingah Di Maria

Argentina coach Lionel Scaloni-a'n World Cup khel tur a thlan lai khan, winger Angel di Maria kha inkhel thei loin a awm mek. Juventus player theihna hrechiangtu coach hian thutlukna huaisen tak siamin a ko tel.

Match hmasa bera Saudi Arabia an hmachhawn ṭumin Di Maria hian bul a ṭan nghal ta ngei a, mahse beisei a phak lo - an ram hi 2-1 in an chak lo zui bawk, a hnu lamah bul ṭan tir a ni zui lo a, bench aṭang erawhin a lut deuh zel.

Final an khelh dawn meuh chuan Di Maria hi a dam chiang tawh a, a tawnhriat neih leh France tlarhnung sir lam khawng tawk lo chu a in rem dawn tih hriain bul ṭantir a ni, ball pawh an pe hnem malh malh hle.

Di Maria hian amah vengtu Ousmane Dembele a bum a, box chhungah ball la lutin penalty a hlawh chhuak a, goal khatna an khung theihna a nih bakah counter attack aṭangin an goal hnihna a khung bawk.

Scaloni-a'n goal ven mamawh zawk nia inngaiin Di Maria a la chhuak a, defender Marcos Acuna a dah lut. An goal nawr a na lo sawt a, goal an chhuah takah phei chuan Argentina coach khan thutlukna a siam sual hleah a ngaih theih, mahse a tawpah erawh an vannei ta zawk.

Olympic, Copa America leh World Cup final-ah Di Maria hian Argentina tan goal a khung vek. South America leh Euro champion inkhelhna Finalissima-ah goal a khung bawk, hun pawimawh leh inkhel boruak sang bika langsar ṭhin a nihna hi Argentina tan chuan a hlut vet vet khawp ang.