Aizawl FC khingpui tur an tiatpui Rajasthan FC

Zanin dar 7:30 hian Aizawl FC-in Dr. Ambedkar Stadium, New Delhi-ah Rajasthan FC an hmachhawn dawn. Tun season I League match riat khelh tawhah Mizo club hian point 12 an hmu a, an khingpui tur Rajasthan hian point 11 an hmu ve bawk - team pahnih hi tun dinhmunah an intluk tawk hle.

Aizawl FC hian coach thar Caetano Pinho hnuaiah result ṭha tak an nei a, an khualmualah Sreenidi Deccan nen 3-3 in an inhnehtawk. Mizo club tan Sreenidi Deccan laka point khat hlawhchhuah hrim hrim hi a ṭha hran lo a, amaherawhchu player 10-a khel chungin injury time-a goal khata an hnufual hnuah siphurh an sut.

Mizo club hian December 17, Inrinni khan RG Stadium-ah Kenkre an mikhual a, 4-0 ngawtin an sawp. Inkhelh hmain coach Pinho chuan, "Result ṭha kan nei ang a, mipuiin kan inkhel an en ang," tiin a sawi.

Aizawl FC hian Rajasthan FC hi an hneh thei a nih chuan RG Stadium-a an inkhelh leh hunah an entu an ngah sawt hei ang. Chutihrualin round 9 zawh hian thlasik chawlh a awm dawn a, Mizo club inkhelh leh hmasak ber tur chu January 9-ah niin Real Kashmir an mikhual ang.

Mizo club-in an match hnuhnung bera Kenkre an hneh hian Mizo tlangval vekin goal an khung. Armed Veng tlangval Lalchhanhima Sailo chuan goal hnih a khung a, David Lalhlansanga leh Jeremy Laldinpuia ten goal khat ve ve an khung bawk.

Coach thar Pinho-a'n Mizo player chungah rinna an nghat a, Kenkre lakah pawh hian player pariat ngawtin bul an ṭan - goal li an khung a ni ngawt lo a, goal an chhuah lo. Mizo club tana goal vengtu hi Mizo tlangval Lalmuansanga a ni.

Bench-ah foreigner Emmanuel Makinde leh Matias Veron te awm mah se coach Pinho-a'n Mizo tlangval panga Lalmuanawma, KC Larchhuakmawia, Lalramsanga, David leh Dindina khelhna hun a siamsak - David leh Dindina ten goal an khung nghe nghe.

Aizawl FC striker Henry Kisekka chu inhliam vangin lakchhuah a ni thung a, Ugandan striker hi hliam vangin New Delhi-ah hruai ve a ni lo. Mizo club tan Kisekka awm lo hi channa nasa tak ni thei mah se Mizo striker-te tan hun ṭha a ni thei bawk ang.

AFC khingpui tur Rajasthan hi match hnuhnung pathumah chak hmel an hmu tawh lo a, match hnuhnung pahnihah Gokulam Kerala leh Trau lakah an tlawm. Rajasthan hian tun hnaiah record nei ṭha tawk lo mah se an mualah erawh zuam chi an ni lo - Neroca leh Kenkre lakah point li an hlawh chhuak.

Rajasthan-ah hian Lalremsanga Fanai, Lalliansanga Renthlei leh Vanlalzahawma te an kawl a, Lengpui tlangval Remsanga hi a club hlui Aizawl FC hmachhawn turin bul a ṭan ngei a rinawm. I League inkhel hi Eurosport, Discovery+ leh DD Sports-ah te a en theih ang.