Ten Hag-a'n De Jong a la duh reng

Manchester United chuan nipui laiin Frenkie de Jong lalut thei lo mah se Barcelona midfielder hi rim nawn an tum, nia sawi a awm a, United boss Erik ten Hag chuan a hmangaih hmasa hi a la bansan hleithei lo niin a lang.

United boss Erik ten Hag hian Old Trafford a pan rual khan De Jong hi a player lakluh tum hmasak berah a nei nghal a, mahse, a man zat thlenga Barcelona nen an inrem chungin a player zawk hi a chhuak duh tlat lo.

Hei vang hian United-in khaw dang hawi zuiin, Brazilian midfielder Casemiro chu Real Madrid aṭangin pound maktaduai 70-in an lalut a, Christian Eriksen chu Brentford aṭangin an lalut bawk.

Mahse, Ten Hag-a lawm a la kim thei lo a, Dutch coach hian a hnampui player, Ajax-a a lo enkawl tawh ni bawk hi Old Trafford-ah seng luh ngei a duh.

Red Devils hi Jude Bellingham nen sawizawm an ni bawk a, mahse, English midfielder duhawm erawh awlsam taka chan theih a ni dawn lo - Liverpool nen pawh sawizawm an ni a, khawvel club lian zingah duh lo an awm kher lo mai thei!

Kum 2020 khan Bellingham hian United training ground Carrington ami chu a lo tlawh tawh a, hetah hian Sir Alex Ferguson nen an inhmu nghe nghe. Mahse, khatihlaia Birmingham City player hian Borussia Dortmund zawk a zawm leh ta tho.

United hian kum 19 mi Bellingham hi lakluh an duh a nih pawhin nipui transfer an nghah phawt a ngaiin a rinawm a, England tana vawi 22 inlan tawh midfielder hian tun season chu German football lamah hman zawh leh phawt a duh ang.

Red Devils hian Cristiano Ronaldo an chân avangin tun thlasikah striker lakluh tur an melh dawn nia sawi a awm bawk a, World Cup-a Netherlands tana che ṭha tak Cody Gakpo hming a ri ring hle.

PSV Eindhoven forward bakah hian Juventus striker Dušan Vlahovic hming lam rik a ni bawk a, mahse, Manchester United hi zawrh mek a nih avangin thlasik transfer-a chet viau hi United tan a harsa mai thei.