Zanin aṭangin English football ṭan leh dawn

Pathianni zan khan FIFA World Cup final khelh a ni a, ni hnih hnuah English Football khelh ṭan a ni dawn. Zanin hian League Cup last 16 khelh a ni dawn a, match li khel tur zingah World Cup final-a player thawh an awm lo.

Wolverhampton Wanderers-in zanin dar 1:15 hian League Two club Gillingham an mikhual dawn a, hemi hun vekah hian Southampton-in League One club Lincoln City an hmachhawn dawn. Leicester City-in League One club MK Dons an tlawh dawn bawk.

Intum tawk tur bera ngaih chu Newcastle United leh Bournemouth an ni a, Premier League club pahnih inkhel an nih avangin Magpies tan chetsual theihna a ni ang.

Howe tan a pawimawh
Newcastle United-in beisei phak bakin season bul an ṭan ṭha a, Premier League-ah pathumnaah an awm mek. Magpies enkawltu Eddie Howe-a'n fak a hlawh a, amaherawhchu nomawi chawi tak erawh tun season bikah chuan thil theih loh tluk a ni - Arsenal leh Man City an awm tlat.

Pathumnaah hian season hmang tawp thei pawh ni se khawvelin pathumna a hre reng ngai lo a, champion erawh a hre reng ṭhin. Hemi a nih avang hian Howe tana nomawi chawi theih awlsam ber chu League Cup a ni.

Magpies hian match hmasa berah Tranmere Rovers chu 2-1 in an hneh a, Premier League club hi second round aṭangin an khel ṭan. Third round-ah Newcastle hian Crystal Palace chu penalty hmangin an hneh hram a, an khelh chhoh dan thlir chuan Magpies hi chesual thei an ni.

Engtin zel?
Newcastle hian World Cup hma match hnuhnung berah Chelsea 1-0 in an hneh a, chawlh chhung khan friendly match khelin Al-Hilal 5-0 a an sawp bakah Rayo Vallecano 2-1 in an hneh.

Magpies hi an striker pawimawh Alexander Isak chu hliam vangin chhawr thei lo thei dinhmunah an ding a, World Cup-a quarterfinal thleng pha Callum Wilson (England) leh Bruno Guimaraes (Brazil) te an inpeih hman dawn em, tih a chiang lo bawk. Chutihrualin England tana tel tho Kieran Trippier erawh khel hman tura beisei a ni.

Eddie Howe chuan, "Player-te an rawn kir tawh a, an dinhmun erawh a inang lo. Alex Isak a la ngai reng a, ni tinin a dinhmun kan thlir. Callum erawh buaina a awm lo, a dam ṭha. Bruno Guimaraes pawh a dam ṭha a, hmalam hun atan a pawimawh ang," tiin a sawi.

Newcastle khingpui tur Bournemouth hian Everton 3-0 in an sawp a, Chris Mepham leh Kieffer Moore te Wales hmingin Qatar-ah zin ve bawk mah se an tlak hma avangin inkhel turin an inpeih tawh. Cherries hi an kim dawn a, hei hi an dinhmun ṭhatna tur a ni ang. Chutihrualin rinkai zawk erawh Newcastle an ni ang.