Messi hi a duh chen chen khel rawh se - Scaloni
World Cup final a khelh hmaa World Cup-a a match hnuhnung ber a khelh tur thu sawitu Lionel Messi-a'n an champion hnuah, international football a chawlhsan rih loh tur thu a sawi zui a, mahse, World Cup 2026-ah erawh kum 39 a ni tawh dawn.
United States, Canada leh Mexico-in an inthlen ṭawm tur World Cup-ah hian Messi a inlan a rinawm tawh lo a, mahse, Argentina coach Lionel Scaloni chuan Messi chuan a duh a nih phawt chuan a squad-ah hmun a la chan reng tur thu a sawi!
Scaloni chuan, "Kan kianga la awm ve reng a duh a nih phawt chuan a tan hmun a awm reng ang," a ti a, World Cup lehpekah kum 39 ni tawh dawn mah se Messi tan kawng a la hawng reng.
A phu alawm
Scaloni chuan, "Argentina tana khelh chhunzawm zel a duh leh duh lohah chuan, thutlukna chu ama siam tur a ni a, duhthlang thei dinhmunah a ding a ni.
"Kan tan chuan player pawimawh tawpkhawk a ni a, ani ang player leh a ṭhiante kaihhruai hi chu kan tan a nuam a, a khelhpuite a hlan chhawn ṭhin thil tam tak hi chu ka la hmuh ngai loh a ni," a ti a, a captain chu a dah sang hle.
Ballon d'Or vawi sarih dawngtu Messi hian ram tan match 172 khelin goal 98 zet a khung ta a, World Cup-ah vawi hnih ngawt best player atan thlan a ni ta bawk - ni e, a hma hun atana duhthlanna a nei hi a thikawm lo e.
Argentina tan
Scaloni hnuaiah Argentina hian nikum lawk khan Copa America nomawi an chawi tawh a, world champion an ni leh ta. Kum 44 mi coach chuan, "Goal kan chhuah chungin, huaisen taka bei ṭhin player kan kawl ṭeuh a ni.
"Heng mite hian an ram mipui tan, Argentina fan-te tan an khel a, chu chu ka mita ka hmuh fo ṭhin chu a ni. Player inkarah inerna a awm lo a, tum inang kan nei a, hei hi kan ram pumpui tan a ni.
"Ram tana inkhelh hi a nuam a, ka player-te khan an theihna zawng zawng an hlan. Khelmuala an tih tur an hriat avangin vawiinah hian kan hlawhtling a, kan hlimin kan hlawhtlinna hi kan chhuang takzet a ni," a ti.
Fak tlak Emi
Scaloni chuan inkhel thlirkirin, "Kan khelh ṭhin dan ang taka kan khelh theih chuan chance kan insiam ang, tihah kan chiang. Theihtawp chhuahin kan nawr a, penalty pet hma pawh khan hahdam taka awm turin ka hrilh a ni," a ti.
Argentina keeper Emiliano Martínez-a'n penalty vawi khat a dang a, vawi khat dang France-in an hlah bawk. Scaloni chuan, "Emi kha a inringtawk em em. A ṭhiante hnenah penalty a dan nual tur thu a sawi a, khatianga a sawi takah kha chuan penalty pet ngam kan nei ta ṭeuh a ni," a ti a, a keeper a fak.
Kum 44 mi Scaloni chuan, "Rei tak kan lo beisei tawh nomawi chu kan chawi ta. Football ngaina em em ram kan ni a, kan zingah Diego Maradona kha awm se chuan, khelmuala rawn tlan lut hmasa ber pawl a ni ngei ang," a ti a, an ram legend awm loh chungchang an zawh chuan amah an hriatchhuahtir thu a sawi.