Social media lut ngam lo Zaha

Crystal Palace forward Wilfried Zaha chuan vun rawng vanga hmuhsitna a tawrh ṭhin avangin a social media account pawh a en ngam loh thu a sawi a, tun thlatir khan vun rawng hmuhsitna lam hawia Zaha hnena message thawntu naupang kum 12 mi chu man a ni tawh. 

Zaha chuan, "Message hi ka en ngam meuh lo a, en ta ila, kan chhiar duh loh message tam takin a lo khat ang tih hi ka hlau a ni. Mi hang footballer tan chuan instagram-a awm ve te hi thil nuam lo tak a ni ta," a ti a, police hnenah account 50 ngawt chu a report tawh thu a sawi. 

West Midlands Police-te chuan vun rawng inhmuhsitna lam hawia Zaha tih el tute chu an chhui mek zel thu an sawi a, Zaha chuan social media company-te pawh tun aia fimkhur lehzual turin a ngen - Palace forward hian a phone-ah twitter pawh a dah duh tawh lo. 

Zaha chuan, "Ka ngaihtuahnaah chuan thil dang kan tih dawn pawhin ID pek zel a ngai a, kan nihna hriatchian an duh zel. Chutiang chiah chuan instagram leh twitter pawh hian an ti mai thei lo em ni?" tiin zawhna a zawt a, ID hman zel a ngaih chuan social media lama huatna thu theh darh ṭhinte an inthlahrun deuh a beisei. 

Professional Foot-ballers' Association thuneitute chuan social media company an titi pui a, an pawl coaching and equalities executive Iffy Onuora chuan instagram, facebook leh twitter-te nena an inbiakna chu tluang taka kalpui a nih thu a sawi.