Ka chuai ve thei lo - Ibrahimovic

AC Milan striker Zlatan Ibrahimovic chuan tleirawl tha za lai ang mai a la nih reng thu a sawi a, a kum tam ve deuh tawh mah se khelmual chhungah chuan a chuai ve thei lo tih a sawi.

Nilaini zan khan Milan hian Sampdoria 4-1 in an hneh. Milan tan Ibra-a'n goal hnih a khung bakah Hakan Calhanoglu leh Rafael Leao ten goal khat ve ve khung bawkin nuamsa takin hnehna an chang.

Kum 38 mi Ibra chuan, "Mite chuan ka kum a tam thu min hrilh ṭhin, a nihna takah chuan a ṭha zawk ni turin ka la inbuatsaih chauh zawk a ni," a ti. Swede striker hian uain ṭha mi ang maia a upat hnuah a ṭhatna a zual thu a lo sawi tawh ṭhin. 

Inkharkhip hnuah Milan hian match an khelh leh hoah chak loh an nei lo. Serie A table-ah parukna ni mekin an match hnuhnung berah Cagliari an mikhual ang - season tharah Europa League an khel pha dawn. Milan coach Stefano Pioli chuan, "Hma kan sawn zel nan Ibra hi a pawimawh hle, kan hnena a rawn kal ringawt khan boruak a siam tawh a, chumai ni loin khelmual chhungah a thawhhlawk hle," a ti.