A khawhar thlak dawn - Hamilton

Tun kar tawp hian Silverstone tlan kawngah Formula 1 British Grand Prix an tlan dawn a, kum dang ang lo takin kuminah chuan a hmuna entu an awm dawn lo. Fans awm loa intlansiak chu Lewis Hamilton chuan a khawhar thlak tur thu a sawi chhuak.

Silverstone-ah hian tun kar bakah kar leh hian inelna neih chhunzawm leh nghal tur a ni. Tlan kawng pakhata inelna an neih nawn chhan hi Covid-19 vang a ni a, ram ṭhenkhatah hri leng vangin inelna neih theih a ni lo a, tlan theihna hmunah an neih tam a ngaih phah.

Mercedes driver Hamilton chuan, "Intlansiak zingah chuan British Grand Prix hi a pui ka ti ber ṭhin, a chhan chu a hmuna entu an tam ṭhin a, driver leh team tan chuan mipuiin an ngaihhlutna aia nuam leh lawmawm a awm thei tawh chuang lo.

"Kuminah erawh a ruak vek dawn, ngaihtuah mai pawh hian a makin a khawhar thlak nghal hle a ni. Boruak danglam deuh ni mah se mahni ram ngei inel tur kan nih avangin theihtawp ka chhuah leh dawn, pakhatna nih leh ka tum ang," a ti.

Britain tlangval hian an rama inelna hi a thunun hneh viau, vawi ruk hnehna chang tawhin record nei ṭha ber a ni. Tun hnai kum ruk chhung bikah pawh vawi nga ngawt hnehna a chang thei. Season hmasa British Grand Prix kha a hmunah entu 140,000 chuang an pungkhawm a, tualchhung tlangval Hamilton chuan amah ang bawka Mercedes car khalhtu Valtteri Bottas hmaa thlengin hnehna 

a chang.