Chelsea-in keeper thar an zawng?

Chelsea-in Premier League match hnuhnung bera Wolverhampton an hmachhawn ṭumin khawvel keeper manto ber Kepa Arrizabalaga bench-ah an dah a, kum 38 mi Willy Caballero-a'n bul a ṭan.

Blues hian Inrinni zan dar 10:00 hian FA Cup final-ah Arsenal an hmachhawn dawn a, Caballero-a'n bul a ṭan nawn a nih chuan Kepa hi a chhuak ngei dawn tihnaah a ngaih theih ang. Thuthang awm danah FA Cup final-ah hian Caballero-a'n bul a ṭan dawn a, Chelsea performance and technical director Petr Cech-a'n a thlakna tur a melh ṭanah an ngai. 

Kum 25 mi Kepa inlan hnuhnun ber chu Liverpool an hmachhawn ṭum a ni a, goal nga a chhuah. Spanish keeper hi pound maktaduai 71.6 man zet ni mah se Stamford Bridge-ah beisei angin a che ṭha tawk lo. Blues kawr haa a lansarh ber ṭum chu Community Shield-ah a ni a, manager Maurizio Sarri-a'n thlak tum mah se Kepa hi a chhuak duh lo.

Frank Lampard hnuaiah Kepa hian hming chhiatna langsar a nei lo a, statistics-ah erawh a mualpho. Tun season-ah Kepa hi Premier League-ah vawi 33 a inlan a, goal 47 a chhuah. Chelsea keeper save percentage hi 55.4% chauh a ni a, khawvel league sang pasarih keeper 132 zingah 127-na a ni.

Premier League-a vawi 10 tal inlan tawh goalkeeper-te zirchianna neih a ni bawk a, season hnih chhungin Kepa save percentage hi 54.5% a ni a, keeper 730 zingah a record a chhe ber. Blues tana kum hnih chauh a la khel chungin Premier League-a Chelsea goal chhuah  8% a chhuah phak.

Chelsea keeper Kepa hian tun season-a a goal chhuah 47 zinga 14-ah a che miah lo a, a record duhawm lo tak avang hian Frank Lampard-a'n a chhawr duh lo pawh hi a mak hran lo. Blues nen hian Burnley keeper Nick Pope, Ajax keeper Andre Onana leh Manchester United aṭanga Sheffield United-a loan hmanga khel mek Dean Henderson te sawi zawm an ni a, transfer boruak a ngaihnawm chho hle.