A zawna vawi 3 champion Biakkima

Gionee LPS Pro Fight 2017 chu Thawhlehni zan khan R. Dengṭhuama Indoor Sta­dium-ah a hmawr bawk a ni a, Lightfly huang­ah NT Lalbiakkima chuan a vawi thum nan a kawnghren hum­himin Pro Fight title humhim rei ber, lightheavyweight roreltu Abel Lal­awmawia record a nih rual chiah.

Lightfly
NT Lalbiakkima'n harsatna lian tawk lovin a vawi li nan a champion a, a zawna vawi thum title a humhimna a ni chiah thung, F. Zoramchhana lakah inhnek thununin unanimous decision-in a chak.

A tir aṭangin kum 21 mi Biakkima'n nung takin a khel a, hnek rang leh hnek tam zawk a nih bakah thiamna ṭha tak tak a hmang a, Zotea'n a do let zo lo. New Siaha fighter hi judge pathumin round tinah an chaktir vek a, 50-45 vekin a chungnung a ni.

Pro Fight-a a tumpui tawh lakah tlawm nei miah lovin Biakkima a chak tluang zel a, 2014 khan khel ṭanin Laldin­mawia kut atangin title a chhuhsak a, kum 2015 leh 2016 khan a humhim tawh bawk.

Bantam
Dinthar tlangval Zonun­tluang­a'n a vawi khat nan title a humhim a, kum hmasa ang bawkin hneh takin amah chotu HC Lalramfela a nawr a, una­nimous decision-in a chak.

Zonuntluanga (Tetea) hian kum zawnin Title Fight-ah Ramfela a hneh. Kum kal ta khan round hmasa berah a hnek tlu nghal a, Chawngtlai boxer tho lehin a tawp thlengin bei zui mah se a kir zo tawh lo. Tun ṭumah pawh Tetea'n inhnek a thunun tam zawk a, judge pathum point pekah 48-46, 49-45, 49-45 in a chak a ni.

Round hnuhnung ber tirah an innuai tawn hle a, thahrui nei leh fei zawk Assam Regiment fighter Tetea'n round tawp lam a thunun. Nikuma a tlawmna chhang let tumin Chawngtlai chhuanvawrin bei ngial mah se a bet zawkah a ṭang a, hremna a tawrh tel bawk avangin Title Fight a khelh zawn vawi thumnaah ṭum hnih a tlawm zawn.

Light
Lalrinawma'n a duhthusam hlawhtlinna a sual chhuak ta, Title Fight a hmachhawn vawi thumnaah technical knockout-in C. Lalrosanga a hneh a, a vawi khat nan a champion. Kum 2009-a Pro Fight kalpui a nih aṭangin Rinawma'n lightweight champion nih a tum nghal a, kum riat hnuah a nghak chhuak.

Kum 25 mi Govt. Complex fighter hian champion a tum tak zet tih Maubawk boxer Rosanga lakah a lantir a, champion kawng­­hren bakah best boxer ni chungin a ṭha thei ang berin cham­pionship a khar.

Middle
Zarzoliana'n a duh ang taka khelh harsat mah se hnehna kawng sial turin harsatna lian a tawk lo va, mi thar Lalnithanga lakah unanimous decision-in a chak a, title a humhim.

Kum 30 mi Zotea hian amah hnaihchilh rengtu Nitea hmaah a theihna leh thiamna ṭha takin a lantir zo lo. Mahse, tawnhriat a neih hmang ṭangkaiin hnek tam zawk leh inhnek thununtu a nihzia chiang takin a lantir a, judge pathum point pekah 50-45, 50-45, 49-46 in a chak vek.

Middleweight fighter ropui a nihna Zotea'n a nemnghet nawn leh a, Pro Fight-a hlawhtling ber leh vawi li champion thei mi pali zingah a tel a, kum 2010, 2011 leh 2016-ah a champion tawh a ni.

Lightheavy
HC Johnkenty Vanhlimpuia'n chungchuang takin ke a pen zui zel a, vawi hnih a hnek tluk hnuin round thumnaah technical knockout-in Lallawmkima Sailo a hneh a, a vawi khat nan lightheavyweight title a humhim.

Kum 21 mi Vana'n round hnihnaah a hnek tlu a, round thumnaah a hnek tlu leh. Lawm­kima'n bei zui zel mah se Tuipui fighter-in a veiin a hnek fuh siah a, hruihrual kilah hual chep zuiin a hnek zawn zui nghal a, Lawmkima chiaiin a inveng ringawt a, referee PC Lalnun­mawia'n round thumna minute 1 leh second 51-ah inhnek a titawp.

Kum 2014 leh 2015-ah kum zawnin middleweight-ah Vana a champion a, nikumah light­heavy-ah insawnin Title Fight-ah PC Lalmuankima a knockout. A khelh leh hmasak berah Chaltlang Lily Veng fighter hmaah knockout bawkin hnehna a chang leh a, Abel Lalawmawia, NT Lalbiakkima, Zarzolianate nen Pro Fight fighter hlawhtling ber huangah awmin vawi li ṭheuh an champion tawh a ni.

Title Fight Thlirna Tawi
Lightfly
NT Lalbiakkima (Siaha) bt F. Zoramchhana (Cherhlun)
Unanimous Decision (50-45, 50-45, 50-45)
Bantam
Zonuntluanga (Dinthar) bt HC Lalramfela (Chawngtlai)
Unanimous Decision (48-46, 49-45, 49-45)
Light
Lalrinawma (Govt. Complex) bt C. Lalrosanga (Maubawk)
Technical Knockout (Round 5, 1:30 min)
Middle
Zarzoliana (Sawleng) bt Lalnithanga (Chhingchip)
Unanimous Decision (50-45, 50-45, 49-46)
Lightheavy
HC Johnkenty Vanhlimpuia (Tuipui) bt Lallawmkima Sailo (Chaltlang Lily Veng)
Technical Knockout (Round 3, 1:51 min)
LBS Suzuki Fighter of the Night - HC Johnkenty Vanhlimpuia (Tuipui)
GIG Motors Best Boxer - Lalrinawma (Govt Complex)
GIG Motors Best Referee - PC Lalnunmawia (College Veng)
GIG Motors Best Judge - Lalngaihawma Ngente (Khatla)
Lawmman : Champion : Rs 40,000
Runner up : Rs 10,000