India TT champion Jeho-a

Table Tennis Federa­tion of India hnuaia in­el­na ngaihhlut leh season kharna ni bawk, 79th Cadet and Sub-Junior National Table Tennis Championship khelh zawh takah Mizo naupang Jeho Him­nakulhpuingheta chuan Sub Junior Boys Singles huangah gold medal a vaw chhuak a, India number 1 nichungin season a khar.

Goa-a neih inelnaah hian Jeho-a hian Maha­rashtra naupang Dev Shroff lakah 11-5, 8-11, 11-9, 9-11, 11-4, 11-7 in hnehna a chang. Jeho hian seeded pathumna nichungin inelna bul a ṭan a, final-a a khingpui Dev Shroff nena a chak zawk hi India number 1 ni chunga season khar tur an ni - inkhel hmuhnawm takah Jeho-a a chungnung.

India number 1 Jeho leh Mission Veng nau­pang beiseiawm Alberto L.R Ruata te ṭangdun chuan Sub Junior Boys Doubles-ah bronze lain an team chuan Sub Junior Boys Team-ah silver medal a hlawh chhuak bawk a ni.

Harsatna karah

Petroleum Sports Promotion Board (PSPB) zirlai Jeho-a chuan, "Ka taksaah harsatna ka nei a, chutichung chuan nitin stadium chhungah zing dar 6 aṭanga zan dar 10 thleng kan awm a ngai. Singles khelh hmain team match khelh a ngai a, taksa chau taka ka awm lai pawhin Pathian kaihhruaina ka chan avangin tun dinhmun hi ka thleng thei,"

"Final kan khelh lai phei chuan aw rawl chhuak tur pawh a awm lo, vawi khat mah ka au thei lo a ni. Harsa tak chunga India number 1 ni chuanga kumin ka khar thei hi ka lawm takzet," tiin Vanglaini a hrilh. Jeho hian Mizoram Table Tennis Association leh Mizo mipui amah ṭawngṭai pui ṭhinte chungah lawmthu a sawi bawk.

Lunglei Salem Veng naupang Jeho-a hian National Championship-ah title pathum a lakna a ni a, Cadet Boys Singles (2014) leh nikum khan Sub Jr Boys Singles a la tawh bawk - a kum zawnin India champion a ni. Season tharah chuan Junior category-ah a khel tawh ang. Jeho chuan, "Season thar hi ka chak rualin ka huphurh ve hle, theihtawp ka chhuah leh ang," a ti.

Table Tennis-ah chuan India hi zone panga - East Zone, North Zone, Central Zone, Indore Zone leh South Zone-ah te ṭhen hran a ni a, kumin chhungin Jeho-a hian gold, silver leh bronze a la kim vek a, a chetfuh tawk loh ṭum pawhin last 16 leh quarterfinal a lut phak ve ve a ni.