Mizoram aiawh thei tur hming 30 an puang

Nimin khan Mizoram Football Association chuan National Football Championship for Santosh Trophy 2017-18 a Mizoram aiawha tel thei tur player 30 a puang.

Mizoram Premier League Season 6-a Chhinga Veng champion puitu Lalsangzuala Hmar chu coach atan ruat a ni.

North East Zone qualifying round chu Mizoramin a vawi thum nan a thleng dawn a, nakkum January 8-13 chhunga khelh tur a ni.

Mizoram hi Group A-ah Assam, Nagaland leh Arunachal Pradesh te nen an awm ho a, Group B-ah Meghalaya, Manipur leh Tripura te awmin group khat aṭangin pakhat ve ve final round khel turin an tling ang.

AFC leh Police tel loin

Mizoram team-ah hian I League khel mek Aizawl FC player-te bakah All India Police Meet khel tur Mizoram Police player-te koh an ni lo.

Team pahnih hian MPL6-ah mimal lawmman dawng thei turin keeper Avilash Paul leh defender Masih Saighani tiam loin player pathum an thawh. AFC midfielder David Lalrinmuana leh Police goal khung khawl pahnih Lalfakzuala leh F. Lalrinpuia te hi Mizoramin kum 2014-a Santosh Trophy a champion ṭuma player pawi­mawh vek an ni.

Thlan tur zat 20

Probables squad atan player 30 an thlang phawt a, qualifying round khel tur hian player 20 an thlang chhuak dawn a ni.

Mizoram coach Lalsang­zuala Hmar chuan, "Kar khat chuang hret training kan nei tawh a, kan player-te an phur bawk a, team enkawl a nuam a, final selection pawh a har khawp ang. Mizoram aiawha tel pha tur chuan training-naa chet ṭhat a pawimawh ang," tiin Vanglaini a hrilh.

Mizoram manager Hming­thansanga chuan, "Kan thlang chhuak ṭha viauin kan hria. AFC leh Police player bakah inhliam vanga koh loh an awm nachungin kan player neih dan a lungawithlak hle. Mizoram tana theihtawp chhuah thei tur player kan duh a, ti ṭha lo tan hmun a awm lo ang," tiin inthununna an ngaih pawimawh tur thu a sawi.

Goalkeeper

MPL6 best goalkeeper F. Lalmuanawma hi nikuma Mizo­ram number 1 a ni a, kuminah erawh Chhinga Veng goalkeeper Zothanmawia nen khelhna hmun an inchuh dawn. Chhingcows treble champion puitu T. Mawia hi season liam ta khan Aizawl FC tan I League a khelh avangin Mizoram team-ah a tel lo.

Goalkeeper hi pathum koh tur a ni dawn a, Chanmari West keeper Lalmalsawma leh Lalrinnunga ten tel pha turin vanneihna an mamawh ang. Khawhai tlangval Rinnunga hi first division club SL Sailo Electric Veng FC tana khel a ni a, MPL khel lo koh awm chhun a ni.

Defender hi

MPL best defender R. Lal­din­liana leh Chanmari defen­der pawimawh C. Lalrosanga ten I League khel tura Aizawl FC an zawm avangin squad-ah telh an ni lo a, best defender nominee zinga mi Thomas Lalengkima pawh Hyderabad lam a pan avangin koh zingah a tel lo.

Mizoramin state pawnah left back ṭha an thawn chhuak hnem a, Chhinga Veng left back Ramfangzauva inhliam vangin koh a ni lo a, club tana a khelhpui Hmingthanmawia inhliam chunga koh a ni a, left back tur dap hi coach hna hmasa tur a ni.

Midfield an ṭha

Chhinga Veng midfielder R. Malsawmtluanga'n MFA Super Cup best midfielder, I Day Football best player, MPL6 best midfielder leh best player bakah MPL club buatsaih award-ah Player of the Year chawimawina a dawng a, MS-a hi tha thlah lova a ṭang tlang a nih chuan Mizoram midfield a ngaihtuah awm lo.

Tlarhnung ang thoin mid­fielder an langsar a, Shillong Lajong aṭanga Chanmari West zawmtu Jacob Lalrawngbawla'n Mizoram tan a u V. Lalṭanpuia (Mizoram Police midfielder) hnu a chhui pha dawn em tih chu zawhna ni a, khelhna hmun chang pha tur pawhin kawng a la thui.

Goal khungtu lam

MPL6 best forward nominee a tel pha zingah Malsawmfela chiah koh theihin a awm a, Police leh AFC player ni lo Ramhlun North foward Lal­rinfela chu Hyderabad lam a pan avangin a tel dawn lo.

Tlar hmaah hian Chhinga Vengin Sawmfela (MPL6 - 7 goals) bakah Lalrammuanpuia (3 Goals) leh MS Dawngliana (5 Goals) te an thawh a, Kelkang tlangval Lalkhawpuimawia erawh Aizawl FC a zawm dawn avangin koh a ni lo.

BVT forward Lal­rammawia (2 Goals), Chanmari FC forward MC Malsawmzuala (5 Goals) bak­ah Ramhlun North forward Lalremruata (8 Goals) te koh an ni.

Probables Squad
Sl.No Name Club Veng/Khua
Goalkeepers
1 F. Lalmuanawma Chanmari FC Khawbung
2 Lalmalsawma Chanmari West FC Mamit
3 Lalrinnunga SL Sailo Electric FC Khawhai
4 Zothanmawia Chhinga Veng FC College Veng
Defenders
5 C. Lalmuanawma Chanmari FC Champhai
6 C. Ramdinmawia Ramhlun North FC Armed Veng South
7 Hmingthanmawia Chhinga Veng FC Bethlehem Vengthlang
8 K. Lalmalsawma Bethlehem VT FC Bethlehem Vengthlang
9 Lalhlimpuia Chanmari West FC Lunglei
10 Lalmawizuala Chanmari West FC Nisapui
11 Lalrinchhana Tochhawng Chhinga Veng FC Mamit
12 PC Laldinpuia Bethlehem VT FC Samthang
13 R. Lalthantluanga Dinthar FC Khawlailung
14 Zomuanpuia Mizoram Police Chhinga Veng
Midfielders
15 Jacob Lalrawngbawla Chanmari West FC Tlungvel
16 K. Lalnunzama Bethlehem VT FC Zawlsei
17 Laldampuia Chhinga Veng FC Kawrtethawveng
18 Lalmuanzova Chanmari FC Kanhmun
19 Lalnuntluanga Bethlehem VT FC Bawngkawn
20 Lalrinchhana Chhinga Veng FC Electric Veng, Aizawl
21 Lalromawia Chanmari West FC Samlukhai
22 R. Malsawmtluanga Chhinga Veng FC Darlawn
23 Ṭhasiama Chanmari FC Tuikual South
24 Vanlalbiaa Chhangte Chanmari FC Hriangtlang
Forwards
25 Lalrammawia Bethlehem VT FC Sawleng
26 Lalrammuanpuia Chhinga Veng FC Armed Veng South
27 Lalremruata Ramhlun North FC Tuikual North
28 M.S Dawngliana Chhinga Veng FC Bawngkawn
29 Malsawmfela Chhinga Veng FC Ramhlun South
30 MC Malsawmzuala Chanmari FC Siaha
Coaching Staff
1 Lalsangzuala Hmar Coach Melthum
2 Hmingthansanga Manager Chhinga Veng
3 R. Lalramzauva Asst Manager Chawnpui
4 Zaihmingthanga Asst Coach Venghlui
5 Anand Gurung Physio Tanhril