Mahuma Memorial Chhinga Veng an thiam ber

Mizorama 1st Di­vision Cricket club-te inelna Mahuma Memorial Cricket Tournament-ah Chhinga Veng aia thiam an awm lo - 3C tia hminglem an pek cricket club hian nimin khan final hmuhnawm takah Chanmarians an hneh a, a chungnung zawk an nihna hi run sarih a ni.

Suaka Memorial Cricket Ground, Sih­hmui-a inkhelah ṭhum­vawr aṭangin Chhinga Veng vanneihna a inṭan nghal a, 3C hian bat hmasak an thlang. Mahse, beisei loh takin opening batsman K. Vanlalruata leh Ricky Lalthlamuana te run siam loin an out nghal a, Chhinga Veng ṭan­tute thin phu a rang hman.

Mahse, 3C tan pres­sure sang tak hnuaiah state pawn player pahnih Abhay Joshi (72) leh Samik Das (64) te an rawn ding chhuak a, Lalhruaimawia Ralte chuan run 34 rawn thawh ve leh bawkin over 40-ah run 206 an siam a, wicket sarih an hloh.

Chanmarians tan final boruak sanga target run 207 vuakchhuah a awlsam dawn lo tih a chiang. Mahse, Chanmarians tan captain K. Lalremruata'n (43) innghahna tlak a ni tih pholangin opener Lalhruaizela'n (46) pangngai takin a rawn vaw bawk a, an dinhmun a ṭha hman.

Mahse, game inhneh­tawk takah Pritam Gurung (21) leh Lalthanzuala (21) ten a tawp khar zo lovin over 39.2-ah run 199 siamin an out vek a, run sarihin Chhinga Veng an chak a, an champion.

3C tan bowling lamah William Pachuau chu player langsar a ni a, ani hian run 35 lek pein wicket thum a la a ni.

Final Result
Chhinga Veng CC: 206/7 (40) bt Chanmarians CC: 199/10 (39.2)
*Run sarihin Chhinga Veng an chak
Mimal Lawmman
Man of the Series Samik Das (Chhinga Veng CC)
Best Batsman Lalhmangaiha (Chanmarians CC)
Best Bowler Zothanchhunga (Kulikawn CC)