Ronaldo tan thil mak tih a ngai!

Cristiano Ronaldo tan Golden Shoe leh Serie A goal khung hnem ber ni turin thil mak tih a ngai dawn. League match khelh hmabak pakhat chauh an neih tawhah Ronaldo hian goal 31 a nei a, a chungah goal 35 khungtu Ciro Immobile a awm.

Juventus-in 'Scudetto' an humhim tih a chian hnua an match hmasa berah Cagliari 2-0 in an hneh lo. Nilaini zan inkhel dangah Lazio chuan Immobile leh Joaquin Correa te goal hmangin Brescia chu si hnih faiin an lo hneh ve thung.

Hliam vangin Paulo Dybala, Douglas Costa, Danilo, Mattia De Sciglio leh Sami Khedira an inlan thei lo a, midfielder Adrien Rabiot chu hrem a ni bawk. Kum 35 mi Ronaldo erawh khelmualah minute 90 chhung a inlan.

Portuguese forward hian league goal khung belh theihna hun a nei a, a goal khung chu offside vanga pawm a nih loh bakah hnai tak aṭangin a hlah. Ball chang tam mah se Juve an hriam lo, forward Dybala awm loh a lang - Ronaldo meuh pawhin vawi tam khung tum mah se a hlawhchham.

Juventus hian league match hnuhnung bera atan Inrinni zan hian AS Roma an mikhual dawn. Ronaldo tan goal khung hnem lawmman dawng tur chuan a tlem berah goal li tal a khung a ngai a, a khung a nih pawhin Immobile-a'n a khung belh loh a ngai tel.

Palina Lazio tan Immobile chu chhandamtu a ni chhunzawm zel. Italian forward hian Correa goal khung tur a siamsak bakah penalty a chhuih lut. Serie A season kal laiah penalty aṭanga a goal khung zat chu 14 zet a ni ta.

Kum 30 mi Immobile-a'n a match hnuhnung berah Napoli a hmachhawn dawn. Napoli hi season tir lamah talbuai deuh mah se nikum December thla a Gennaro Gattuso an neih hnuah an insiamṭha a, a bik takin an tlarhnung a phui avangin goal khung belh a awlsam lo ang.

Italian league lian berah hian Gonzalo Higuain chuan Napoli tana a khelh laiin 2015-16 season khan goal 36 a khung tawh, goal khung hnem record a ni. Immobile tan mahni ram league sang bera season khat chhunga goal khung hnem ber record siam a châkawm dawn.