I League roreltu Minerva Punjab

Season ṭan a nih hma khan champion tura rinkai zingah 'Minerva Punjab' telh ta ila, Indian football hrechiangtu inti te nuih a za ngei ang–mah se, tunah chuan he thil hi nuihzatthlak a ni tawh lo a, champion tura rinkai zingah Minerva Punjab an tel tawh.

Punjab club hian match nga an khelh tawhah tlawm hmel an la hmu lo–match li hnehna changin vawi khat an khingpui an inhnehtawkpui a, anmahni hnaih bertu Shillong Lajong aia an san zawkna chu point thum a ni. Minerva hian player naupang rual leh tha za rual an kawl khawm a, an foreign player thlengin kum naupang tak vek an ni.

Season hmasaah Aizawl FC-in thil mak thlentirin nomawi an chawi tawh a, chu thil mak thlentir tur chuan AFC zinkawng Minerva-in an zawh ve mek–Punjab club hi December 27-ah Aizawl FC hmachhawn turin RG Stadium-ah an inlan dawn a, Mizo club-in lo dan chah an tum ang.

The Bhutanese Ronaldo

Minerva Punjab-in pre season aṭangin thawm an nei nghal a, 'The Bhutanese Ronaldo' tia hminglem an pek Chencho Gyeltshen an lakluh tirh khan mipuiin he Bhutan international lakah hian beiseina neih thiam an harsat. Mahse, kum 21 mi lek forward hian India a rawn pan hnuah season ṭan hma hauhin a hming a chher nghal a, Bengaluru nena friendly match-a an inkhelah hattrick a siam nghal!

Bhutan tan match 28 a khelha goal 10 khungtu forward hian I League season ṭan a nih hnuah pawh a hming a chher chhunzawm a, Minerva tan player langsar pawl a ni der tawh–match li a khelhah goal hnih a khung tawh a, game-ah team tan a thawhhlawk bawk. Thai Premier League club Buiram United tan pawha lo khel tawh hian Aizawl FC tlarhnung chhaih mangang turin theihna a nei tih a chiang a, tlarhnung pherh AFC coach Paulo Meneses-a'n ngaihtuahna a sen ṭhat a ṭul dawn.

Goal = Opoku

Middlesbrough-ah meuh 'long term contract' ziak thei khawpa player hmabak nei eng a ni a, tunah pawh kum 20 bak a la ni chuang lo–kan sawi hi a hming chu William Opoku a ni a, Minerva Punjab striker a ni. Ghana U20 international hlui hian I League-ah Punjab club tan match li an khelh tawhah a la khel kim vek a, goal thum a khung tawh.

Opoku hian Ghana Division One club Okyeman Planners-ah a career bul ṭanin 2016 khan he club-a a season hnuhnung ber hmangin goal 11 a khung sak a, February 2017 khan Boro chuan contract an ziahpui. Mahse, Opoku hian English club-ah a beisei ang hmun pawimawh erawh a chang nghal lo a, Estonian club Levadia Tallinn-ah loan-a chhuahtir niin tunah chuan Minerva tan a khel ta–en bik a sual lo ang.

Rampawn player

Minerva-in Chencho leh Opokuchiah hi ram pawn player an neih ṭhat an ni lo. Estonian club ṭha JK Sillamae Kalev aṭangin Senegalese midfielder Kassim Aidara an lalut a, Germany-a piang, kum 30 mi midfielder hian New Zealand club Wellington United aṭanga bul ṭanin German division hniam lamah Niendorfer TSV, USC Paloma, Lüneburger leh SK Hansa tan a khel tawh.

Punjab club midfielder hian ṭhiante tana goal siamsak bakah a khung pawh a thiam tel a, 2013 khan nikuma a khelhna Sillamae tan match 34 khelin goal 17 zet a khung sak a, AFC tlarhnung tan ngaihthah a thiang dawn lo. Japanese midfielder Toshiya Hosoe hi Australia, Philippines, Sri Lanka leh Maldives thlenga tawnhriat lo nei tawh a ni a, tlarhnunga ban rinawm Guy Eric Dano hi Ivorian club ṭha Jeunesse Club d'Abidjan aṭanga an lakluh a ni a, ani paltlang tur hian AFC tlarhma ten rilru huaisen an put a ṭul ang.

A harsa dawn

Shillong Lajong laka an chak loh hlimin AFC coach Paulo-a'n, "North East Derby-ah chak lo mah ila kan tho lehnghal ang. Rim takin hna kan thawk lehnghal ang a, kan tih dik tawk lohna nia kan hriat lai apiangah insiamṭha turin kan inzir nghal ang," tiin Vanglaini a hrilh a, Minerva laka insiamṭhat erawh hna hautak a ni dawn tih a chiang.

Punjab club hian ram pawn player ṭha tak tak bakah Indian player ṭha tak tak an kawl nual a, tlarhnunga Dano nena inkawp ṭhin India tan age level hrang hranga inlan tawh leh Pune City defender hlui Deepak Devrani, season hmasaa RG Stadium-a rawn inkhel tawh Kamalpreet Singh te ho hi player tawhkhirh tak an ni vek.