Real tana rinawm Modric

Luka Modric chuan Real Madrid tan a football nun hman zawh vek a duh thu a sawi chhuak. Modric hian kum 2012 khan Tottenham aṭangin Bernabeu a pan a, a dam phawt chuan player pawimawh a ni phak.

Croatian midfielder chuan, "Real Madrid ka zawm khan ka duhthusam a thleng dik. He hmunah hian khawvel hmun hrang hranga player ṭha ber berte nen kan thawkho a, hlimna kan tawng hnem tawh hle. Ka duhthusamah chuan he hmunah hian ka football nun hman zawh ka duh, chutih rualin rei lote chhungin thil a inthlak danglam ve thut ṭhin bawk," tiin a sawi.

Kum 32 mi Modric hian Real Madrid tan hian Champions League, UEFA Super Cup, FIFA Club World Cup leh La Liga te a chawi vek tawh a, season kal laiah erawh an hmelma leh elpui ni bawk Barcelona chu point 11 zetin an phak lo mek.

Inrinni zana El Clasico an khelh tur thlirin Modric chuan, "Kan inringtawk em em a, ṭum dang ai chuan kan fimkhur lehzual chu a ngai ang. Barca hmachhawn turin kan inpeih tawh a, game ṭha tak kan khelh theih ngei ka beisei," tiin a sawi.