Ali ngaisangtu Kom-i

World champion vawi nga ni tawh Mary Kom chuan boxing khawvela hming dai ngai tawh lo tur Muhammad Ali a ngaihsan thu leh phurna siamsaktu a nih thu a sawi.

Kum 35 mi Kom hian fa pathum a nei tawh a, member of parliament (MP) a ni mek bawk. Hetichung hian boxing ring chhungah a la inlan fo a, Indian boxer chhuanvawr ber pakhat a la ni thei.

Manipuri boxer Kom chuan, "Muhammad Ali hi khawvel huapa mi hmingthang a ni a, dinhmun harsa leh khirhkhan ka tawh lai pawhin amah kha ka en tlat ṭhin a, a chanchin hian phurna leh huaisenna min pe thar leh ṭhin a ni," tiin world heavyweight champion vawi thum ni thei Ali a dah sang hle.

Mary Kom hian nakkum April thla a neih tur Commonwealth Games chu a hmathlir hmasa a nih thu a sawi a, London Olympic-a bronze medal a lo lak tawh aia hlu zawk Tokyo Olympic-ah lak theih a la beisei thu a sawi bawk.

November thlaa Asian champion ni leh thei Kom chuan, "Mi ṭhenkhat chuan kum tam tawh leh inkhel thei tawh lo turah min ngai ṭhin, tun dinhmunah ka la fit tawk a, nitin mai hian hmasawn turin ka la bei reng a ni," tiin a sawi.